Moderator.az tanınmış yazar Ədalət Tahirzadənin öz facebook səhifəsində paylaşdığı bir statusu oxuculara təqdim edir:

Bu gün .........saytında Murad adlı bir qardaşımızın “Azəri-Türk Qadın Cəmiyyəti və onun cəmiyyətdəki rolu” adlı yazısına və orada təsadüfən öz adıma rəst gəldim. Murad qardaşımız yazır: “İgid odur atdan düşə, atlana!

 Bu yazını 1990-cı ildə Nazim Quluyev yazmışdır və “Azadlıq” qəzetində Ədalət Tahirzadə məhz tələbə Nazim Quliyevə istinadən böyük bir məqalə alınmışdır”.

 Cümlə elə belə də yazılıb və mübtəda ilə xəbər uzlaşmır. Mənim mübtəda-xəbərlə və məqalədə yazılan başqa mətləblərlə əsla işim yoxdur. Ancaq bildirmək istəyirəm ki, mən Nazim Quliyev adlı adamı nə tələbə olduğu vaxt tanımışam, nə də indi tanıyıram. Haqqında heç bir təsəvvürüm yoxdur. Yazılarına da heç zaman istinad etməmişəm, çünki onları oxumamışam.

 İndisə həmin yazı haqqında. 1990-cı ildə Azərbaycan Ali Sovetinə seçkilər keçirilməliydi və “Demblok”dan olan namizədləri Nəcəf bəy Nəcəfovun redaktor, mənim redaktor müavini olduğum “Azadlıq” qəzeti geniş təbliğ edirdi. Mən də həmin münasibətlə bir namizədi dəstəkləyən “İgid odur atdan düşə, atlana!” adlı yazını “Azadlığ”ın 8 sentyabr 1990-cu il 9-cu sayında çap etdirdim. Guya hansısa tələbəyə istinad etdiyim haqqında bir vaxt kiminsə fikir söyləyə biləcəyi onda ağlıma belə gəlməzdi.

 Tərcümeyi-halımızın təmizliyini qorumaq borcumuzdur. Biz susanda başqaları özünü haqlı sayır. Ancaq dəyərli feysbukdaşlarım qarşısında boynuma alıram ”“ kaş o məqaləni yazanda qələmim sınaydı! İndi onu yazmağıma çox peşmanam, çünki yazdığım adam orada yazılan sözlərə layiq çıxmadı. Bu, məni ömrümün sonunadək incidəcək...”