Təbii sərvətləriylə zəngin olan Azərbaycanda hələ də qaçqın və köçkünlərin bir tikə çörək qazanmaq problemləri qalmaqdadır. Hər gün Moderator.az-ın elektron poçtuna onlarla bu cür şikayət məktubları gəlir. Məktub müəllifləri dövlətin onlara barmaqarası baxmasından, insan yerinə qoyulmamalarından, aldıqları məvaciblərin, sosial yardımların azlığından gileylənirlər. Ən dəhşətlisi isə budur ki, onsuz da bir neçə günlük tələbatlarına belə çatmayan bu vəsaitləri bəzən ala da bilmirlər.
Belə şikayətçilərdən biri də İsmayılov Valeh Qambay oğludur. Özünün bildirdiyinə görə, 1964-cü ildə Ağdam rayonunda anadan olan Valeh bəy hərbi xidməti başa vurduqdan sonra doğma el-obasına qayıdır, rayon Mədəniyyət şöbəsində işə düzəlir. Şöbənin sürücüsü kimi idarə etdiyi Qaz-53 markalı avtobusla Ağdam mədəniyyət xadimlərinin qulluğunda dayanır. Ermənilərlə döyüş başlayan andan isə öz xidməti maşınıyla hərbçilərin ən yaxın dostuna, bələdçisinə və sürücüsünə çevrilir. Dediyinə görə Ağdamın müdafiə olunmasında hər kəs kimi o da əlindən gələni əsirgəməmiş, Mədəniyyət şöbəsinin işçisi olmasına baxmayaraq ordu rəhbərlərinin bütün əmr və göstərişlərini canü-könüldən yerinə yetirmişdir. Döyüşlərdə könüllü iştirakına görə o, həm də müharibə veteranıdır.
Valeh bəy döyüş bölgələrində yaşadıqları çətinliklərdən, qorxu dolu anlardan çox danışmaq istəmir. Öz torpağını qorumaq üçün qolunu çırmaladığından buna görə heç kimdən təşəkkür də gözləmir. Bununla belə müsahibim dövlətin qaçqın və köçkünlərə göstərdiyi qayğıdan yararlana bilmədiyindən incidiyini də gizlətmir və bunun günahını rayon rəhbərliyinin yarıtmaz fəaliyyətində görür. Həm köçkün, hən müharibə veteran olmasına baxmayaraq bu qədər vəzifləri daşıyan bir adam Ağdam rayon İcra Hakimiyyəti tərəfindən gözümçıxdıya salınırsa digər köçkünlərin nələr çəkdiyini təsəvvür edə bilmir.
Valeh bəyin əsas şikayəti öz maaşını ala bilməməsidir. 1984-cü ildən bəri işlədiyi Ağdam rayon Mədəniyyət və Turizm şöbəsindən hər ay 110 manat maaş alırdı. Bu qədər məvacib, təbii ki, onun aylıq ehtiyaclarına kifayət etmirdi. Bununla belə ailə büdcəsinə az da olsa köməkliyi dəyirdi. Di gəl ki, o öz halal maaşını artıq 7 aydır ala bilmir. Dəfələrələ şöbənin yetkililərinə bunun səbəbini öyrənmək məqsədilə etdiyi müraciət isə heç bir nəticə vermir. Rəhbərlik tərəfindən ona maaşının dondurulduğu bildirilir. Valeh İsmayılov isə bunun səbəbini anlaya bilmir. Onu şikayətə vadar edən də elə budur.
Redaksiyamızın əməkdaşı da bu məsələyə aydınlıq gətirmək üçün müraciət etdiyi Ağdam rayon Mədəniyyət və Turizm şöbəsinin rəhbərliyindən qaneedici cavab ala bilmədi. Şöbənin müdiri Şahin Qasımov ümumiyyətlə telefonumuza cavab vermədi. Məcburən şöbənin baş müsahibinə zəng etdik. Baş müsahib Bəloxar Novruzov əvvəl bizə məlumat verdi ki, Valeh İsmayılovun maaşı onlar tərəfindən kəsilməyib. Bütün günahların hamısı Nazirlər Kabinetindədir. Belə ki, bir neçə il bundan qabaq Nazirlər Kabineti köçkün rayonlarının mədəniyyət şöbələrindəki bütün sürücülük ştatlarını ləğv edib. Sürücü Valeh də hökumətin bu mərhəmətsizliyinin qurbanı olub.
Doğrusu, Nazirlər Kabinetinin belə bir sərəncam imzalamasına inanmadıq. Köçkün rayonlarına qayğıdan dəm vuran hökumətin Valeh İsmayılovun ayda 110 manatına göz dikməsi bizə xeyli müəmmalı göründü. Valehin özü də bu məlumatın əsassız olduğuna inanır. Odur ki, Nazirlər Kabineti tərəfindən verildiyi iddia olunan sərənacamın tarixiylə maraqlandıq. Sualımızı eşidən baş müsahibin cavabı isə xeyli sərt oldu. O, nədənsə sualın mahiyyətinə uyğun cavab vermək əvəzinə ağzını açıb gözünü yumdu və kobud ifadələrlə redaksiyamıza o məlumatı verəni də, bizi onun başına müsəllət edəni də söyüş atəşinə tutdu.
Mədəniyyət adamının bu “mədəniyyətini” görəndə Valeh İsmayılovun niyə 7 aydır maaş üzünə həsrət qaldığının səbəblərini anladıq. Məsələ deyəsən Nazirlər Kabinetinin qəbul etdiyi hər hansı sərəncamda deyil, mədəniyyət ocaqlarımızın həvalə olunduğu şəxslərdədir.
P.S. Yazını sayta yerləşdirməzdən öncə təkrarən Ağdam mədəniyyət şöbəsinin müdiri Şahin Qasımovla əlaqə saxlamaq istədik. Şöbəyə etdiyimiz telefona xanım işçilərdən biri cavab verdi və müdirin iş yerində olmadığını, İcra Hakimiyyətinə getdiyini bildirdi. Redaksiya olaraq bəyan edirik ki, məsələylə bağlı Şahin Qasımovun da, əlaqədar rəsmi qurumların da mövqeyini işıqlandıra bilərik.