Son vaxtlar Rusiyanın Qərbə yönəlik nüvə təhdidləri artmaqdadır. Bununla bağlı Moderator.az-a açıqlama verən politoloq Qabil Hüseynli Kremlin verdiyi bütün sərt bəyanatlara rəğmən Rusiyanın həqiqətən də nüvə silahının tətbiqinə əl atacağına inanmadığını vurğulayıb. Ekspertin sözlərinə görə, hazırda Rusiyanın nüvə sistemi ABŞ və digər Qərb ölkələri ilə müqayisədə əhəmiyyətli dərəcədə geridə qalır:

 “Mən Rusiyanın hansısa mərhələdə nüvə silahına əl atacağına inanmıram. Nüvə  təhdidi qarşı tərəfin məhvindən çox Rusiyanın özünün məhvi ilə nəticələnə bilər. Çünki Rusiyanın nüvə sistemi o qədər də mükəmməl və modern deyil. Amerika və NATO-nun nüvə sistemi nüvə hücumundan, nüvə zərbəsindən qorunmaq üçün daha mükəmməldir. Bu ölkələrdə nüvə qalxanı deyilən bir sistem mövcuddur. Bu sistem Reyqan dönəmində, “ulduzlar müharibəsi” proqramı əsasında formalaşdırılıb. Həmin müdafiə sistemi əsasında Rusiyanın addımlarını izləmək, onun hücumlarını önləmək və əks-zərbə endirmək mümkündür”.

“Rusiya ABŞ-a 100 raket atsa...”

Politoloqun bildirdiyinə görə, Rusiyadan ABŞ-a atılan hər yüz raketdən sadəcə birinin nüvə qalxanını yararaq hədəfə dəyməsi ehtimalı var ki, bu da Kremlin nüvə savaşında qalib gəlməsi üçün yetərli deyil:

“Əgər Rusiya belə bir addıma cəsarət etsə, döyüş başlıqlı nüvə raketlərinin Amerikaya çatması üçün minimum 12 dəqiqə lazımdır. Bu 12 dəqiqə ərzində ABŞ-ın malik olduğu hava hücumundan müdafiə sistemləri həmin raketi uzağı 5 dəqiqə ərzində müəyyənləşdirib havadaca məhv etmək potensialına malikdir. Mütəxəssislər hesab edirlər ki, Rusiyanın 100 ballistik raketindən sadəcə birinin nəzəri baxımdan ABŞ-ın nüvə qalxanını yarıb keçmək imkanı var. Əgər Rusiya 100 raket atsa, cavab olkaraq 200 raket də ABŞ və ya İngiltərə, Fransa buraxacaq. O zaman Rusiya tar-mar olar. Rusiyanın bütün nüvə mərkəzləri hazırda ciddi təhdid altındadır. Rusiyanın nüvə raketləri yerindən qalxandan 3 saniyə sonra məhv edilə bilmək kimi təhlükəyə məruz qala bilər. Bu isə o deməkdir ki, Rusiyanın nüvə müharibəsində qalib gəlməsi mümkün deyil”.

“Rusiya öz geriliyinin fərqindədir”

Politoloqun qənaətincə, əgər Rusiya ABŞ və Qərbə qarşı nüvə savaşına start verərsə bu, qısa zamanda bütün  Rusiyanın nəhəng xarabalığa çevrilməsi ilə nəticələnə bilər:

“Rusiyanın nüvə təhdidləri də əsassız təhdidlərdir. Ola bilsin ki, Rusiyann ABŞ-a atdığı bir raket sızıb Nyu-Yorka düşə bilər. Lakin ABŞ-ın bütün raketləri Sankt-Peterqburqdan tutmuş bu ölkənin ta o başına qədər Rusiyanı darmadağın edər. Uzaq dağ kəndlərində və ya ola bilsin ki, hansısa meşədə kimlərsə sağ qalsın və ya qalmasın”.

 Q.Hüseynlinin sözlərinə görə, nüvə sistemi sahəsindəki geriliyi Rusiyaya da yaxşı məlumdur və bu səbəbdən də Kremlin təhdid xarakterli bəyanatları psixoloji təzyiq elementi kimi başa düşülməlidir:

 “Nüvə müharibə bəşəriyyət üçün çox ciddi təhlükədir. Rusiya bunun fərqində olmalıdır və habelə belə bir savaşa hazır olmadıqlarını da anlamalıdır. Zənnimcə onlar öz geriliklərini anlayırlar. Hesab edirəm ki, Rusiyanın nüvə savaşı ilə bağlı səsləndirdiyi açıqlamalar sadəcə psixoloji təzyiq vasitəsidir”.

Seymur Əliyev