Qadınlara verilən dəyər, qadının cəmiyyətdəki yeri, qadın-kişi bərabərliyi, qadın hüquqları və s. mövzular haqqında çox danışılıb, çox yazılıb. Mən də bu haqqında yazmışam. Yazım kommunist-darvinist zehniyyətin qadına baxışı haqqında idi. Bu barədə araşdırma apardığım zaman diqqətimi çəkən cəhətlərdən biri xurafatçıların qadınlar haqqında uydurduqları saxta hədislər oldu. Xurafatçılar Darvinin qadınlar haqqında alçaldıcı fikirlərinə bənzəyən saxta hədisləri dinimizin adından təqdim edir, Allaha və Peyğəmbərimizə (səv) qarşı yalan uydururlar. 

Xurafatçılar qadını yarım varlıq kimi görür, əllərinə düşən hər imkanda cəmiyyətdən təcrid etməyə, daim alçaltmağa çalışırlar. Onların əsas götürdüyü hədislər bir çox İslam ölkəsində niyə qadınların hələ də əzildiyini, təcrid edildiyini daha yaxşı anlamağınıza kömək edəcək. Mövhümatçılar qadınların məsələləri ətraflı düşündüklərini, ağıllı fikirlər yürütdüklərini, incə məqamları gördüklərini bildikləri üçün onları müxtəlif üsullarla cəmiyyətdən kənarlaşdırırlar. Bunun üçün də saxta hədislərdən rahat şəkildə istifadə edirlər. Bu isə xurafatçıların iç üzünü açıb bizə göstərir.

Bu saxta hədislərdən bəzilərini diqqətinizə çatdırmaq istəyirəm:

Qadınların arasında yaxşı qadın yüz qarğa içində bir ala qarğa kimidir. (Sahih-i Buhari)

Qadınlara itaət peşmanlıqdır. (Tezkiratul Mevzuat: 128, Kitabul Mevzuat: 2, 272)

Döymə edənə və etdirənə, üzündəki tükləri alan və gözəllik üçün dişlərini seyrəltdirən qadınlara Allah lənət etsin. (Sahih-i Buhari)

 Parik taxan, saç qoyduran, qaşlarını alan, aldıran, döymə edən və döymə etdirən lənətlənmişdir. (Ebu Davut, Tereccul, 5)

  Ey qadınlar! Əgər həyat yoldaşınızın sizin üzərinizdə olan haqlarını bilsəydiniz, ayaqlarının tozunu üzünüzə sürtərdiniz. (Hafız Zehebi, Büyük Günahlar Sayfa 187)

 Əgər bir kimsənin kimsəyə səcdə etməsini əmr etsəydim, kişilərin qadınlar üzərində olan haqlarına görə, qadınların kişilərə səcdə etmələrini əmr edərdim. (Sahih-i Buhari)

 Namazı pozan şeylər qara it, eşşək, donuz və qadındır. (Sahih-i Müslim, Salat 265; Tirmizi Salat 253/338 Ebu Davud, Salat, 110/720)

 Uğursuzluq üç şeydədir: Qadında, evdə və atda. (Ebu Davud, Tıb, 24/3922; Müslim, Selam, 34/115 Buhari, Nikah, 17/4805)

Bu hədislər Qurana və dinimizə tamamilə ziddir. Qadınlar haqqında istifadə olunan çirkin ifadələrin heç birinə Quranda rast gələ bilməzsiniz. Əksinə, Quranda qadınlar gözəl bir bitkiyə, çiçəyə bənzədilir. Qadınların kişilərə itaət etməsi haqqında olan hədis də Qurana tamamilə ziddir. Quranda Səba məlaikəsindən, onun hökmranlıq etdiyi dövlətdən bəhs olunur. 

Mən onlara padşahlıq edən, özünə hər şey verilmiş və çox böyük bir taxtı olan bir qadın gördüm. Nəml surəsi, 23

Və ona tabe olan əyanların Səba məlaikəsinə itaətini göstərən ayə:

“... Hökm sənindir. Nə əmr edəcəyinə özün bax!” Nəml surəsi, 33

Hz.Xədicə də Məkkənin ən varlı qadınlarından idi. Onun ticarət karvanları var idi, işini də özü idarə edirdi. 

Kişilərin qadınlar üzərindəki haqları haqqında hədislər tamamilə saxtadır, belə ki, Qurana görə üstünlük ölçüsü təqvadır. Bundan başqa heç bir xüsusiyyətinə görə kişi qadından üstün deyildir, yəni kişinin qadın üzərindəki ödənilməz haqları, üstünlüyü kimi anlayışlar Qurana ziddir və saxta hədislərdir. Dinimizi doğru öyrənmək üçün yeganə mənbəyimiz Qurandır. 

Bu mövzu, əslində, çox geniş və əhatəlidir. Bu barədə, yəni saxta hədislərlə bağlı daha çox nümunə çəkmək olar. Lakin bizim üçün vacib olan Quranın qadına verdiyi dəyərdir. Peyğəmbərimiz (səv) Quranın ən doğru tətbiqedicisi olmuşdur. Onun qadınlarla necə davrandığına baxdığımız zaman xanımları ilə qaçış yarışları keçirən, dəvəyə minməyə kömək edən, hər imkanda xanımları tərifləyən, başını xanımının çiyninə qoyub oturan bir peyğəmbər görürük. 

Sonda isə xurafatçıların çox az bəhs etdiyi hədislərdən bəzilərini yazmaq istəyirəm.

"Sizin ən xeyirliniz, xanımına qarşı ən yaxşı münasibət göstərənlərdir". (İ. Asakir)

 Xanımlarınızı incitməyin. Onlar Allah-Təalanın sizə əmanətidir. Onlarla mülayim davranın, yaxşılıq edin! (Müslim)

Xanımını döyən Allaha və Peyğəmbərinə (səv) asi olar. Qiyamətdə onun qarşısında mən olaram. (R. Nasıhin)

Ən üstün mömin xanımına ən yaxşı, ən lütfkar davranan, gözəl əxlaqlı kimsədir. (Tirmizi)