Bəri başdan deyim ki,söhbət heç də tarixi düşmənlərimiz, hikkəsinə görə daim əzilən, alçaldılan, təhqir edilən nankor qonşularımızdan getmir. Onlar düşməndir və düşməndən bundan artıq nəsə gözləmək əbəsdir.                                               

Söhbət heç hakimiyyətin dizinə vuraraq sındırdığı, onun süfrəsinin tör-töküntüsündən yallanan, tamahının girovuna  çevrilmiş girovlardan- milli satqınlardan da getmir.                                                                                                                                   

Bəs onda söhbət hansı girovlardan gedir?                                                                                                                

Bildiyimiz qədər, qədim zamanlardan şəriət qaydalarına görə, düşməndən başqa kimsənin kimisə girov götürməsi qadağan edilirdi. Amma nə fayda, elə müsəlman ölkələrinin özündə bu qaydaya  əməl edilmir, avtoritar rejimləri hökm sürən ölkələrdə, xüsusən də müsəlman ölkələrində insanlar azad fikirlərinə görə öz ölkələrinin hökmdarlarının şəxsi girovuna çevrilirlər. Bu iddianın təsdiqi kimi  üç  müsəlman ölkəsini-Azərbaycanı, Özbəkistanın və Səudiyyə  Ərəbistanını göstərmək kifayətdir.                                                                             

Başlayaq Azərbaycandan. Az qala bütün dünyaya  məlumdur ki, fərqli düşüncələrinə  görə balaca bir ölkədə 100-dən artıq siyasi məhbus, yaxud siyasi baxışlarına görə qondarma maddə ilə ittiham olunan şəxslər var. Onların da hamısının  ancaq  və ancaq bircə  günahı  var: Ölkədə tüğyan edən haqsızlığa, ədalətsizliyə, korrupsiyaya, rüşvətə, millətin sərvətlərinin talanmasına etirazları, sərgilədikləri cəsarətli mövqeləridir. İndiki  siyasi məhbuslar da əvvəllər zindanda çürüdülüb daha sonra ağalarına  biət edərək  “çıxanlar” kimi   zorla “ əf” ərizələri yazsaydılar, indi çoxdan çöldə idilər. Onlar bunu etmədilər, heç vaxt etməzlər də. İndi də gözdən pərdə asmaq üçün öz "uşaqlar"ından təzə bir  ictimai komissiya qayırıblar ki, guya onlar  şərlənərək həbs edilən kimisə əfv etdirəcəklər. Amma hamı, o cümlədən hakimiyyətin süfrəsindən pay uman “əfv”çilər də gözəl bilirlər ki, siyasi məhbuslar sistemin girovudur və  bütün dünyanın gözü qarşısında onları saxta ittihamlarla zindanlara  dolduran da, ordan çıxaran da hər kəsə gün kimi aydındır...                                                                                                                                                                                                                               

İndi keçək Özbəkistana. Burda  da əkə qardaşlarımızın  vəziyyəti  ürəkaçan deyil, əksinə, daha acınacaqlıdır. 76 yaşlı İslam ( ada bax ha!) Kərimov nə az, nə çox, düz 24 ildir özbəklərin anasını ağlar qoyur, millətə qan uddurur. Əlbəttə, orda da sözünü deyənlər var, lakin Əndican hadisələrindən-bir qocanın hikkəsi ilə dünyanın gözü qarşısında 500-dən artıq günahsız etirazçının məhv edilməsindən sonra  milli azadlıq hərəkatı boğulmaq üzrədir. Bununla belə, hər 5 ildən bir özünü prezident elan edən İ.Kərimovun da vəziyyəti  o qədər ürəkaçan deyil. İndi başqası yox, onun doğmaca qızı-müğənni,bəstəkar,modelyer,biznesledi Gülnarə Kərimova  ölkədə baş alıb gedən haqsızlıqlara, ədalətsizliklərə susmur, atasının diktatura üsul- idarəçiliyinə üsyan edir. Bu üsyanın nəticəsidir ki, xeyli vaxtdır o xanım ev dusdağı edilib və bütün dünyanın gözü qarşısında  atası İslam (!) Kərimovun  şəxsi girovuna çevrilib.                                                                                                                     

İndi də gəlin 3-cü girov sahibi ilə tanış olaq. Çoxları üçün təəccüblü olsa da bu şəxs Səudiyyə Ərəbistanının kralı, Allah evinin sahibi Abdulla İbn Abdal Əziz Əl-Səiddir. Məlum olduğu kimi, Səudiyyə Ərəbistanının mövcud qanunlarına görə, ölkədə dövlət qurluşunun dəyişməsinə edilən çağırışlar edamla  nəticələnir. Buna baxmayaraq, kralın qızlarından biri-Saxar bu ilin ortalarından bütün ərəb ölkələrini öz atasının rejiminə qarşı qalxmağa çağırıb.Özünün video müraciətində kralın böyük qızı özü və 3 bacısı ilı ev dustağı, girov saxlandıqlarını demiş və əminliklə bildirmişdir ki, xalq ayağa qalxdığı təqdirdə qalib gələcəkdir. Saxar video müraciətində günahsiz həbsxanalara atılan, işgəncələrə məruz qalan insanları salamlamış, siyasi məhbusların oz  inqilabi mübarizəsini davam etdirməyə çağırmışdır.                                                                            

Dörd məhbus qızın anası,biçarə  Anud əl Fayəz hal-hazırda İngiltərədə yaşayır və qızlarının  girovluqdan xilası üçün var gücü ilə mübarizə aparır. O, hətta ABŞ prezidenti B.Obama ilə Səudiyyə Ərəbistanı kralının görüşü ərəfəsində də B.Obamaya yalvarmış, qızlarının girovluqdan azad edilməsini xahiş etmiş, lakin göründüyü kimi,bütün dünyanın gözü qarşısında onun da müraciəti nəticəsiz qalmışdır.                                                                                                                              

Üç nümunədən də göründüyü kimi, ölkələrdə girovların çoxalmasının bir günahı- həmin ölkələrinin rəhbərlərinin üzərinə düşürsə,bir günahı da özünü demokratiyanın beşiyi hesab edən, lakin bəşəri dəyərlərin tapdalanmasına  hansı məqsədlərə görəsə göz yuman, daxilən tam azad olmayan  ölkələrinin liderlərin üzərinə düşür. Ona görə də elə onların özlərinə də azadlıq tələb etmək doğru olardı...                                                                                                               

Azərbaycanın siyasi məhbuslarına-girovlarına,bütün dünyanın  girovlarına azadlıq.                                                                                                                           

Özünü  bütün türk dünyasının lideri hesab edən Türkiyə prezidenti  Rəcəb Təyyib Ərdoğan başda olmaqla,bütün dünya müsəlmanlarının rəhbərlərinə azadlıq.                                                                                                              

Dünyanın super dövləti ,demokratiyanın beşiyi hesab olunan ABŞ-ın prezidenti Barak Obama başda olmaqla bütün xristian dövlətlərinin rəhbərlərinə azadlıq.                                                                                                                                                                    

Mətləb Mütəllimli,28.12.2014.