Fransada bir mizah dərgisinə edilmiş terror hücumu Azərbaycan ictimaiyyətində də ciddi müzakirələrə yol açdı. Hadisəni terror aksiyası kimi qiymətləndirib qınayanlar olduğu kimi, onun növbəti “11 sentyabr” şousu yaratmaq niyyətindən doğduğuna inananlar da var. İqtisadçı ekspert Elçin Qurbanov da məsələyə təmkinlə yanaşanlardandır.

İqtisadçı ekspsert Moderator.az-a verdiyi açıqlamada bunları bildirdi:

“Dünya görünməz barmaqla qarışdırılır. Əsası 1095 ”“ci ildə qoyulan və iki yüz il davam edən səlib yürüşü sanki yenidən başlanıb və bu işə bütün dünya qoşulub. Xüsusilə son günlərdə baş verən genişmiqyaslı terror aktları dünya ictimaiyyətini daha çox sarsıdır. İslam radikalizmi deyilən təxribatlar, siyasi oyunlar daha intensiv hal almağa başlayıb.

Fransada baş verən növbəti hadisə İslam peyğəmbərinin karikaturası ilə əlaqələndirilir. Hadisəni elə təqdim edirlər ki, guya, qətlə yetirilən mətbuat nümayəndələri günahsız hücuma məruz qalıblar. Bunun nə dərəcədə doğru olduğunu zaman göstərəcək. Fəqət zənnimcə, insidentin yalnız bu amil üzərində araşdırılması bir çox yanlış qənaətlərin formalaşmasına zəmin hazırlaya bilər. Obyektivlik naminə digər ehtimal və mülahizələr də ciddi araşdırılmalı, tədqiq olunmalıdır.

 Qeyd etmək lazımdır ki, həmin mətbuat öz fəaliyyətində iqtidarı ciddi tənqid hədəfinə almaqda başqalarından daha çox fərqlənirdi. Digər tərəfdən mətbuat nümayəndələri də gərək dünya əhalisinin 24 faizindən çoxunu təşkil edən müsəlman xalqlarının mənəviyyatına, incə hisslərinə toxunmaya, özlərini hədəfə çevirməyələr. Əks təqdirdə bundan artığını da gözləmək mümkündür. Çünki bu, bir vicdan məsələsidir. Fikrimcə, məlum insident də, karikaturaların dərci də eyni ssenarinin müxtəlif tərkib hissələridir. Əvvəl bu karikaturalar dərc etdirilərək bu insidentə şarait yaradılmış, sonra da həmin terror aksiyası həyata keçirilmişdir".

Siyasilərini tənqid və hətta təhqir edilməsini demokratik dəyərlərə aid etməyin hardasa mümkünlüyünə inanan Elçin Qurbanov iki milyarda yaxın insanların vicdanına sataşmağın yolverilməzliyinə, demokratiyanın əlaməti olmadığını düşünür: “Əksinə, bu yanaşma digər insanların vicdan azadlıqlarına basqı etməkdir”.

Ekspertin fikrincə, Fransa hakimiyyəti bənzər təxribatları gözləməliydi, məhz buna görə də məlum olaylarda rəsmi Parisin ləng hərəkət etməsi bir xeyli müəmmalı görünür: “Yəqin bilirəm ki, Fransa hökumətinin “Şarli Ebdo” jurnalının redaksiyasına hücum barədə gözləntiləri var idi. Bu kimi təxribatların qarşısı, sözsüz ki, vaxtında alınmalıydı. İlk öncə peyğəmbəri təhqir edən mətbu orqanın əməkdaşları bu addımlarıyla bir sıra təxribatlara tuş gələ biləcəkləri haqqında məlumatlandırılmalıydılar ki, insident ortaya çıxmasın”.

Elçin Qurbanova görə, nə qədər gec olsa da istər Fransanın, istərsə də bütün dünya dövlətlərinin bundan sonra da edə biləcəyi xeyli işlər var: “Hadisənin bəzi missionerlərin gözlədikləri kimi genişmiqysalı səlib yürüşü səviyyəsində alovlandırılmasına əsas verilməməlidir. Dünya əhsalisi başa düşməlidir ki, məqsəd təkcə müsəlmanlara qarşı yönəlmiş basqı deyil. Bütövlükdə dünya xalqlarına qarşı aparılan çirkin siyasətdir”.