Qarabağ Azadlıq Təşkilatının sədri, Beynəlxalq Qarabağ Forumunun koordinatoru Akif Nağı Türkiyənin Qars şəhərindəki Baş konsulumuz Nuru Quliyevlə görüşüb. Görüşdə Azərbaycanın Qarsdakı Baş konsuluna qarşı ASİMDER Dərnəyinin rəhbəri Göksel Gülbey tərəfindən irəli sürülən bəzi əsassız iddialar, iftiralar, şantaj, təhdid və bununla bağlı yaranan xoşa gəlməz vəziyyət müzakirə olunub. Bu şantaj və iftiraların əsas səbəbi isə Baş konsulun Azərbaycan Respublikası vətəndaşlarının hüquq və toxunulmazlıqlarının müdafiəsi ilə bağlı olmuşdur. Baş konsul Nuru Quliyev bildirib ki, bu cür heç bir əsası, sübutu olmayan açıq-aşkar böhtan xarakteri daşıyan ittihamlarla Azərbaycan dövlətinin Qarsdakı təmsilçisinə ittihamlar irəli sürülməsi Azərbaycan dövlətinə qarşı ən azından hörmətsizlikdir. Ona görə də bu cür əsassız ittihamlarla Azərbaycan-Türkiyə münasibətlərinə xələl gətirmək istəyən istənilən şəxsin hərəkətlərinin, mövqeyinin qarşısı alınmalıdır. Biz burada Azərbaycan dövlətini təmsil edirik. Ona görə də bizə qarşı bu cür iftiraların səsləndirilməsinə heç vaxt yol verə bilmərik. Üstəlikdə burada bəzi açıq–aydın qərəzli mövqe, şübhəli məqamlar, hansısa sifarişlərin olması diqqəti çəkir. 

Bu məsələ bizi narahat edir və bu məsələni biz cavab vermədən, uyğun tədbirlər görmədən buraxa bilmərik. QAT sədri Akif Nağı Baş konsulun fikirlərini, mövqeyini tam dəstəklədiklərini və bu narahatçılığa görə də Bakıdan səfər edərək Qarsa gəldiyini, bu məsələ ilə bağlı öz mövqeyini bildirməyinin vacib olduğunu qeyd edib və açıq şəkildə bu məsələ ilə bağlı narahatlığını bildiribdir. ASİMDER rəhbəri bu cür hərəkətlərə yol verməli deyildi. Onun dediklərində heç bir əsas yoxdur və müəyyən şəxsi maraqlara xidmət edir. Ona görə də biz Baş konsulumuzla görüşməyi özümüzə borc bildik, bu məsələyə bir daha aydınlıq gətirdik, hesab edirik ki, həm Baş konsulumuz, həm də Azərbaycanın maraqları bu məsələdə müdafiə olunmalıdır. Azərbaycan-Türkiyə münasibətlərinə xələl gətirmək istəyən istənilən şəxsin, onun hər hansı hərəkətlərinin qarşısı hökmən alınmalıdır. ASİMDER başqanı eyni zamanda bizim də üzvü olduğumuz və bizim təşəbbüsümüzlə yaradılan Beynəlxalq Qarabağ Forumunun üzvüdür və hesab edirəm ki, bu cür hərəkətlərdən sonra onun Beynəlxalq Qarabağ Forumunda qalması da məqsədə uyğun deyil. Ona görə də bu məsələ hökmən yaxın vaxtlarda Beynəlxalq Qarabağ Forumunun üzvləri və koordinatorları qarşısında qaldırılacaqdır.

QAT sədri Qarsda eyni zamanda bir sıra yerli tanınmış sivil toplum dərnəkləri ilə görüşlər keçirib, toplantılara qatılıb, bir sıra tanınmış şəxslərlə, o cümlədən uzun müddətdir Qars Qafqaz Universitetinin kafedra müdiri və professoru kimi çalışan Hacıalı Nəcəfoğlu ilə də görüşüb, bu və digər məsələlərlə bağlı fikir mübadiləsi aparıb, eyni zamanda Qarabağ həqiqətlərinin Türkiyədə, o cümlədən Qarsda təbliği ilə bağlı bəzi məsələləri müzakirə ediblər. Akif Nağı daha sonra Qarsda fəaliyyət göstərən tanınmış sivil toplum dərnəklərinin rəhbərlərinin təşkil etdiyi toplantıya qatılıb. Toplantıda Qarabağ həqiqətlərinin təbliği, həm Türkiyədə həm digər ölkələrdə Qarabağ həqiqətlərinin yayılması, qeyri hökumət təşkilatlarının fəaliyyətinin əlaqələndirilməsi ilə bağlı müzakirələr keçirilib. Bu müzakirələrdə Qarsda fəaliyyət göstərən Şəhid Ailələri və Qazilər Dərnəyinin başqanı Möhsün Akçay, ictimai xadim Oktay Akdaş, Yardımsevərlər Dərnəyinin başqanı Yasin Aşkın Yıldırım, AK partiyanın Qars il başqanının yardımçısı Turqut Zaman, İstiqlal Savaşı Şəhid ailələri və Qazilər Dərnəyinin başqanı Yılmaz Koliyit həmin dərnəyin başqan yardımçısı Haşim Akgül, Azərbaycan Qafqaz Kültürləri Dərnəyinin başqanı Göyəsəddin Söymən, ictimai xadim Turan Oral, Müharibə Qaziləri Dərnəyinin başqanı Yüksəl Öztürk və digərləri toplantıda çıxış edərək Qarabağ həqiqətlərinin təbliği, ümumiyyətlə Türkiyə və Azərbaycan qeyri hökumət təşkilatlarının, elm adamlarının, təhsil təmsilçilərinin əməkdaşlığı və digər məsələlərlə bağlı fikir və təkliflərini söyləyiblər. Akif Nağı toplantı boyunca bir neçə dəfə çıxış edərək Qarabağın işğaldan azad olunması üçün Türk və İslam dünyasının birgə fəaliyyətinin vacibliyi, Türkiyənin bu müqəddəs savaşda oynaya biləcəyi rolu, qarşılıqlı əməkdaşlıq sayəsində görüləcək işlər və digər məsələlərlə bağlı fikirlərini və mövqeyini bildiribdir. Sonda Azərbaycan və Türkiyə qeyri hökumət təşkilatlarının birlikdə həyata keçirəcəkləri tədbirlərlə bağlı razılıq əldə olunubdur.