Mayaları şər-böhtanla tutulmuş haylar bu gün Qarabağda "prezident" və "parlament" seçkiləri kimi şər işlərinə elə səhərin gözü açılmamış şərlə başladılar. Ermənilərə görə güya dünən Azərbaycan-Ermənistan dövlət sərhəddində Azərbaycan silahlı qüvvələrinin "təxribatı" nəticəsində Tavuş vilayətinin Baqanis və Voskevan yaşayış məntəqələri atəşə tutulub və eyvanda olan 14 yaşlı bir uşaq sinəsindən qəlpə yarası alıb. 

O dəqiqə "Qara məni basınca, mən qaranı basım" deyimi ilə hərəkətə keçən   Ermənistanın ombudsmanı öz facebook səhifəsində BMT-nin "Uşaq hüquqları" konvensiyasına əsaslanaraq bu olayla bağlı beynəlxalq hüquq müdafiə strukturlarına xüsusi məktub göndərəcəyini bildirib.   

Əslində Ermənistanın Azərbaycan torpaqlarını illərdir işğalda saxlaması və BMT-nin, Ümümdünya Səhiyyə Təşkilatının dünya dövlətlərini koronavirus bəlası ilə mübarizə aparmağa çağırdığı bir zamanda, heç kimi vecinə almadan Qarabağda qondarma "seçki" keçirməsi bütün dünyaya qarşı ən böyük təxribatdır. Bəlkə də həmin uşaq heç qəlpə yarası deyil, eyvandan yıxılaraq öz sinəsini əzib və ya çızıb. Ancaq haylara belə bir gündə bəhanə üçün qarışqa versən belə onu mütləq fil kimi qəbul edəcəklər.

Bu gün 31 mart, Azərbaycanlıların soyqırım günüdür, 102 il bundan əvvəl əliqanlı erməni quldurları tərəfindən ölkənin müxtəlif şəhər və rayonlarında - Bakıda, Şamaxıda, Salyanda, Qarabağda, Qubada və digər bölgələrdə günahsız insanlar qətlə yetiriliblər. Məhz belə bir ağır tarixi gündə ermənilərin Qarabağda özlərinə yeni "başçı" və "başbilənlər" toplusu seçimi etməsi ən azı qətlə yetirilmiş soyqırım qurbanlarının ruhuna, Azərbaycan cəmiyyətinin isə vicdanına ən ağır təhqirdir.     

Baxın, Ermənistanda koronovirusla bağlı karantin elan olunmasına baxmayaraq Qarabağda keçirilən "seçkilərə" minə yaxın "müşahidəçi" və 100-dən artıq "jurnalist" gəlib. Ümumilikdə 280 seçki məntəqəsinə polislərin hesabına görə 103 663 nəfər "seçici" gəlməlidir. Xan yurdunda "prezident" olmağa 14 nəfər, parlamentdə parlamaq üçün isə 33 mandata sahib olmaq üçün 12 partiya və bloklardan olan namizədlər can atırlar. 

Əlbəttə, adları yan-yana düzülmüş bu namizəd "yanların" hansının qalib gəlməsi Azərbaycan cəmiyyətini bir o qədər maraqlandırmır. Cəmiyyəti "evdəqal" şəraitində olsa da Azərbaycan tərəfinin bu qanunsuz seçkiləri susqunluqla müşahidə etməsi daha çox narahat edir.

Tərslikdən nə BMT, nə də hamının "sevimlisi" olan ATƏT-in Minsk Qrupundan da hər hansı münasibət yoxdur. Elə bil bir neçə gün bundan əvvəl pandemiya ilə bağlı tərəflərə atəşkəsə riayət etmələrinə çağırış edib "aradan çıxan" Anjey Kasprişk ərşə çəkilib. Görəsən o, niyə qondarma qurumun "seçki" oyununa reaksiya vermir? Belə də ki, onun nə vecinədir Qarabağ Azərbaycandır, yoxsa, Ermənistan.

Zəhrimara qalmış bu koronavirus da gəlməyə vaxt tapdı. Onu bəhanə edərək sanki hansısa bir gizli qüvvə Azərbaycan tərəfə pıçıldayır: "Qarabağda seçki gedir, səsini çıxarma, evdə qal!"

Ancaq təəssüf ki, Azərbaycan tərəfinin Qarabağda qanunsuz keçirilən "prezident" və "parlament "seçkilərinə" hələ ki rəsmi münasibət bildirməməsi, onu qabaqlayan Türkiyənin Xarici İşlər Nazirliyinin ATƏT-in Minsk Qrupunu və digər beynəlxalq təşkilatları Ermənistanın Dağlıq Qarabağda keçirdiyi "seçkiləri" baykot etməyə çağırması isə ermənilərə yeni bir şantaj etmə şansı vermiş oldu. 

Baxın, erməni icmalçı Naira Ayrumyan Ermənistan XİN-nin sərhəddə baş vermiş son olayla bağlı bildirdiyi - "...Hazırki insident onu təsdiq edir ki, ya Azərbaycan tərəfi öz ordusuna nəzarət edə bilmir, ya da qəsdən vəziyyətin kəskinləşməsinə cəhd edir" bəyanatına əsaslanaraq, Ermənistan XİN faktiki olaraq Azərbaycanda hakimiyyətsizliyin hökm sürdüyünü və bunun beynəlxalq aləmə təhlükə yaratdığını demək istədiyini qeyd edir. Bu azmış kimi, erməni icmalçı Türkiyənin qanunsuz seçki ilə bağlı verdiyi son bəyanatını da kölgəyə salaraq - "Türkiyə açıq şəkildə ən azı Naxçıvana görə Azərbaycan hakimiyyətinə iddia edir və hətta Azərbaycan silahlı qüvvərələrinə komandanlığı öz əlinə almağa cəhd edir. Həmçinin, Ankara Bakını müharibəyə sürükləyir, lakin, dünyada indi neftin ucuzlaşdığı bir  zamanda Bakı hərbi toqquşmaya qadir deyil", - deyə, ağlına gələn manipulyativ fikirlər bildirir.   

İndi Azərbaycan tərəfinə yeganə təsəlli verən odur ki, Qarabağda keçirilən "prezident" və "parlament" seçkilərinə beynəlxalq müşahidəçilər qatılmadı. Maraqlıdır, məgər bu, ermənilərin əsas niyyətini dəyişdimi?

Doğrudur, güman etmək olar ki, Azərbaycan XİN-ni gec də olsa bu boyda oyuna ən yaxşı halda bildirəcəyi rəy ənənəvi olaraq - "Bu seçkiləri heç bir dövlət və beynəlxalq təşkilat tanımır", olacaq. Belə baxanda bundan artıq nə deməlidir ki? Əslində bu yerdə "Babəkin sözünü qılıc deyəcək!" deyimini dəyişib   "Azərbaycanın sözünü Ordu deyəcək!" kimi dilə gətirmək daha yaxşı olar.   

Sonda onu da deyək ki, Ermənistan mediasının verdiyi məlumata görə dünən saat 16:09-da Kəlbəcər rayon mərkəzindən 33 km aralıda 3 bal gücündə zəlzələ olub. Görünür ermənilərin bu "seçkisinə" şəhidlərin nigaran ruhu öz etirazını, qəzəbini gizlədə bilməyib, Azərbaycanı indiki halda heç olmasa səsini çıxarmağa haraylayıb. Ancaq nə fayda, hər səs Xanın səsi deyil ki, Qarabağdan havalansın...