DTX-nın bir-birinin ardınca icra hakimiyyəti və digər qurumlarda keçirdiyi əməliyyatlar cəmiyyətdə məmnunluqla qarşılanmaqdadır.

Bəs tənqidi medianın indiki məqamdakı aktivliyi ölkədə rüşvət və korrupsiyaya qarşı mübarizəyə kömək edən, güc orqanlarına bu məsələdə əlavə ipucları verə bilərmi?

Moderator.az-a açıqlama verən media eksperti Zeynal Məmmədli Azərbaycanda tənqidi media ilə bağlı vəziyyətin qeyri-qənaətbəxş olduğunu vurğuladı:

“Bu günün müstəvisindəın yanaşsaq, belə bir mənzərə üzə çıxır ki, sanki dövlət qurumları korrupsiyaya qarşı mübarizədə mediadan bir addım öndədirlər. Bu, paradoksal bir durumdur. Halbuki, media bu məsələdə dövlət qurumlarından bir - iki addım öndə olmalıdır. Media həmişə irəlidə olmalıdır.

Bildiyiniz kimi, DTX Mədəniyyət Nzirliyində əməliyyat keçirdi. Hələ ortada məhkəmə tərəfindən təsdiqlənən fakt olmadığı üçün qəti nə isə demək mümkün deyil. Lakin baxın, bu günə qədər bir film necə çəkilir, onun büdcəsi necə formalaşır, neçəyə başa gəlir və s. ilə bağlı hər hansı bir jurnalist araşdırması mövcuddurmu? Yoxdur. Kanalizasiya, su çəkilişi ilə bağlı vəziyyət necədir, əhalidən bununla bağlı vəsait yığılırmı, ayrılan pullar necə sərf olunur, nəticə etibari ilə özünü doğruldurmu, bununla bağlı jurnalist araşdırmaları varmı? Yoxdur.

Azərbaycan mediasının ən zəif yeri jurnalist araşdırmalarıdır. Jurnalistikada bu, jurnalistikanın şah əsəri sayılır. Biri var xəbər, biri var xəbərdən törəmə proqramlar, biri də var jurnalist araşdırmaları. Ömrünü bu işə sərf eləmişlər, 30 ilin jurnalistləri bütün bu durumu bilirlər.

Bütün dünyada heç bir hökumət istəməz ki, özünü gözdən salan şeylər üzə çıxarılsın. Burada söhbət siyasi yox, sosial-məişət məsələlərindən gedir. Baxmayaraq ki, nəticə etibari ilə nələrləsə bağlana bilər.

Qəbələdən Bakıya su çəkildi. Nəticə necə oldu? Aramsız su gəlirmi? Bakının suya olan tələbatı təmin olundumu? Xərclənən pullar özünü doğrultdumu? Doğrulmadısa, o zaman niyə bu layihəyə bunca vəsait sərf olundu? Niyə birdən-birə səhralaşma prosesi getməyə başladı? Bütün bunlar yoxdursa, o zaman tənqidi mediadan danışmaq olmaz. Tənqidilik baxımından bizim media Azərbaycan xalqına çox borcludur”.

Seymur ƏLİYEV