Xəbər verdiyimiz kimi, 30 il öncə - 1990-cı ilin aprelində Azərbaycan Respublikasının o dövrkü başçısı, ilk Prezident Ayaz Mütəllibovun göstərişi və Ali Sovetin qərarı ilə əsasən Ermənistan və Qarabağdan didərgin düşən soydaşlarımızın müvəqqəti məskunlaşdırılması məqsədi ilə ölkəmizdə yeni inzibati-ərazi vahidi kimi 2 rayon( Qobustan və Hacıqabul) yaradılıb, digər 2 rayon (Xızı və Ağstafa) isə bərpa edilib.

Moderator.az əməkdaşı həmin dövrdə Respublikamıza rəhbərlik etmiş eks-prezident  Ayaz Mütəllibova müraciət edərək  adı çəkilən rayonların yaradılması və bərpası məsələləri ilə bağlı fikirlərini öyrənib. Keçmiş ölkə rəhbəri bunları deyib:

“Bəhs edilən rayonlar arasında  daha çox diqqətimizi çəkən  Xızı rayonunun bərpası olmuşdu.  Buna isə ciddi səbəblər var idi... Bilirsiz,  biz sovet dövründə SSRİ rəhbərliyinin rəsmi göstərişi ilə iki dəfə  baş vermiş deportasiyalar zamanı Qərbi azərbaycanlıların doğma yurdlarında yaşadıqları relyef, iqlim şəraitinə uyğun olmayan, ilan mələyən, qışda şaxtalı-sazaqlı, yayda qızmar Mil-Muğan çöllərinə köçürülməsi səbəbindən xəstəlik, aclıq və s. ucbatından böyük itkilərə məruz qalmasını nəzərə alaraq 1988-1989-cu illərdə millətçi ermənilər tərəfindən yurd-yuvalarından didərgin salınmış soydaşlarımızın bu dəfə mümkün qədər uyğun bölgədə yerləşdirilməsinə çalışdıq.  Əsasən dağlıq relyefə, mülayim iqlimə malik Xızı rayonunun bərpasında əsas məqsədlərdən biri də bu oldu.  Rayonun bərpa işlərini sürətləndirdik və qısa müddətdə orada  Ermənistandan qaçqın düşmüş soydaşlarımız üçün yaşayış massivləri yaratdıq. Və artıq 30 ilə yaxındır onlar  həmin məkanlarda rahat yaşayırlar...   

Xızı rayonunun rəhbərliyinin təyinatında biz bir sıra amilləri nəzərə aldıq və bu məqsədlə özü də Qərbi Azərbaycan torpaqlarının sakini olan məşhur partiya və hökumət xadimi Maksim Musayevi bu rayonun İcra Hakimiyyətinə başçı təyin etdik.  Maksim müəllim də etimadı doğrultdu və həmin ağır illərin çətinliklərinə baxmayaraq qısa müddətdə həm yerli, həm də Qərbi Azərbaycandan gəlmiş insanlarımız üçün böyük işlər gördü.  Bildiyimə görə, hazırda da Xızı rayonu uğurla inkişaf etdirilir. Bu yolda rayon rəhbərliyinə uğurlar diləyirəm...”  

“Bundan əlavə, digər bölgələrdə də didərgin düşən soydaşlarımız üçün qəsəbələr, massivlər saldırdıq. Məsələn, Abşeron rayonunundakı Mehdiabad qəsəbəsini də bu  Qərbi azərbaycanlılar üçün yaratdıq... 

Qeyd etdiyiniz kimi,   1990-cı ilin aprelində Qobustan və Hacıqabul rayonlarını da yaratdıq.  Ağstafa rayonunu isə bərpa etdik. Həmin rayonların yaradılmasında və bərpasında isə əsas məqsəd xüsusən kənd sakinlərinin sənədləşmə, müalicə, təsərrüfat və s.  işləri üçün uzaq məsafələr qət etməsi, eləcə də bürokratik əngəllərlə üzləşməsinin qarşısını almaq oldu. Məsələn, Hacıqabul rayonu  yaradılmamışdan öncə Salyan rayonuna daxil olan həmin ərazidəki kəndlərin sakinləri müxtəlif həyati problemlərini həll etmək üçün uzaq məsafələr qət edərək  Salyan şəhərinə getməli olurdular. Qobustan və Ağstafa rayonlarında da eyni vəziyyət var idi. Lakin adları çəkilən rayonların bərpası və yaradılması sayəsində vətəndaşalarımızı bu çətinliklərdən qurtardıq...

Bütün xalqımızla yanaşı,  bəhs edilən rayonlarımızın da sakinləri və rəhbərliyinə bundan sonra da şəxsi və ictimai həyatlarında yeni-yeni uğurlar, cansağlığı, xoşbəxtlik diləyirəm...”-deyə sabiq dövlət başçısı xoş arzularını çatdırıb.

Sultan Laçın