Xalq artisti Şeyx Əbdül Mahmudbəyov Moderator.az-a ünvanladığı məktubunda Birinci vitse-prezident Mehriban Əliyevaya müraciət edib. 

Şeyx Əbdül müraciəti zamanı bir neçə problemini M.Əliyevanın diqqətinə çatıdırıb.

Birinci xahişim: Uca Allah rizası ilə mən bu gün ömrümün 77-ci  baharını yaşayıram. Bütün bu illər ərzində mən peşəkar kino xadimi kimi, ömrümün düz 60 ilini fasiləsiz olaraq, bu gün də Milli Kino sənətimizə xidmət etməkdəyəm. Ağsaqqal bir xalq sənətkarı olaraq, mənim uzun illər ərzində bəlli olan xidmətlərimin müqabilində, ən azından aşağı-orta səviyyədə yaşamaq haqqım vardır. Amma çox təəssüflər olsun ki, bu belə deyildir. Çünki mənim, hətta aşağı-orta səviyyədə yaşamaq imkanım yoxdur. Xəstəlik də bir tərəfdən... Bunun üçün mənə yalnız Dövlət səviyyəsində maddi dəstəyin olması lazımdır. Mən Hörmətli Mehriban xanım tərəfindən bu dəstəyin olacağına çox ümid edir və inanıram. 

İkinci xahişim: 75 illik ad günüm münasibətilə daimi seçicisi və tərəfdaşı olduğum, Möhtərəm Prezidentimizin mənə hədiyyə etdiyi 3 otaqlı “pod-mayak” mənzilin təmiri ilə üzləşdiyim maddi problemlə bağlıdır. Belə ki, mən iki ildir məhz maddi çətinlik ucbatından həmin mənzili ən aşağı səviyyədə belə heç cür təmir edib başa çatdıra bilmirəm.

Çox Hörmətli Mehriban xanım, humanistlik və xeyirxahlıq göstərib, hər iki halda əgə mənə köməklik etmiş olarsınızsa, onda mən də qalan ömrümün ahıl çağlarını qismən də olsa, normal yola verər və maddi, mənəvi, psixoloji çətinliklər və sarsıntılar içində qalıb, yaşamaqdan xilas olmuş olardım. 

Hörmətli Mehriban xanım! Son olaraq mən çox düşünüb-daşındıqdan sonra, tam əlacsız qaldığım üçün, əlimi üzümə tutub məhz Sizə müraciət etməyi qərara aldım. Uca Tanrıdan Sizə və ailənizə can sağlığı və xoşbəxtlik, Xalq, Vətən, Dövlət və Dövlətçiliyimiz adına gördüyünüz bütün işlərinizdə isə sonsuz uğurlar arzu edirəm.