Məlum olduğu kimi, son vaxtlar prezidentin köməkçisi Hikmət Hacıyev media və QHT təmsilçiləri ilə silsilə görüşlər keçirməkdədir. Hansı ki, bu görüşlər istər KİV nümayəndələri, istərsə də  vətəndaş cəmiyyəti institutları tərəfindən məmnunluqla qarşılanmaqdadır.

Maraqlıdır, Ermənistanla müharibə şəraitində media və QHT rəhbərləri ilə keçirilən bu görüşlər düşmənin işğalçılıq siyasətinin beynəlxalq müstəvidə daha ciddi ifşa edilməsi, ermənilərin sosial media və informasiya müstəvisindəki təxribatlarının daha çevik önlənməsi və s. baxımından nə dərəcədə əhəmiyyətlidir?

Moderator.az-a açıqlama verən Respublika Veteranlar Təşkilatının sədr müavini, polkovnik Cəlil Xəlilov bu görüşlərin bütövlükdə dövltəçilik mənafeyimiz baxımından mühüm əhəmiyyət kəsb etdiyini vurğuladı:

“Prezidentin köməkçisi Hikmət Hacıyevin istər QHT, istərsə də media təmsilçiləri ilə keçridiyi görüşlər, bu görüşlər zamanı səsləndirdiyi fikirlər və tövsiyələr milli maraqlarımızın daha effektiv müdafiəsi baxımından mühüm əhəmiyyət kəsb edir. Ermənistanın işğalçılıq siyasətini davam etdirdiyi, təmas xəttində zaman-zaman müxtəlif təxribatlar törətməyə cəhd etdiyi bir zamanda, media və vətəndaş cəmiyyətlərinin ayıq-sayıqlıq sərgiləməsi, düşmən təxribatlarını zamanında ifşa etməsi, beynəlxalq ictimaiyyəti erməni təxribatları ilə bağlı vaxtında məlumatlandırması olduqca vacibdir. Hansı ki, Hikmət Hacıyevin media və QHT nümayəndələri ilə keçirdiyi görüşlərdə məqsəd KİV və vətəndaş cəmiyyəti institutunun bu yöndəki fəaliyyətini daha da gücləndirmək, onların daha əlaqəli və koordinasiyalı şəkildə fəaliyyətini təmin etmək, onlara mənəvi baxımdan stimul verməkdir.

Bu gün ölkəmizin işğalçı Ermənistanla yalnız səngərlərdə deyil, həm də informasiya müstəvisində mübarizə aprdığı bir gerçəkdir. Bu isə o deməkdir ki,  səngərdə qərarlaşan əsgərlərimizlə yanaşı, media müstəvisində, QHT sektorunda çalışan vətəndaşlarımız da üzərlərinə düşən məsuliyyəti dərindən drək etməli, bu mübarizənin taleyinin onların hər birindən əsaslı dərəcədə asılı olduğunu dərk etməlidir.

Bu da sirr deyil ki, gənc nəslin vətənpərvərlik ruhunda tərbiyə edilməsində, şəhid və qəhrəmanlarımızın təbliğ edilməsində, vətənpərvərlik şüurunun inkişaf etdirilməsində həm medianın, həm də QHT-lərin mühüm rolu var. Odur ki, media və QHT-lərlə prezidentin köməkçisi səviyyəsində əlaqənin təmin edilməsi, onlara dövlət qayğısının gücləndirilməsi, rəsmi dövlət qrumları ilə vətəndaş cəmiyyəti institutları, media arasında əməkdaşlığın inkişafı milli maraqlarımız baxımından mühüm əhəmiyyət kəsb edir. Cənab Hikmət Hacıyevin təşəbbüsü və liderliyi altında bu sahədə konkret addımlar atılmaqdadır.

Bunu da qeyd edim ki, məhz Hikmət Hacıyevin Türkiyəyə məlum səfəri zamanı iki dövlət arasında birgə media platformasının yaradılması məsələsi gündəmə gəlib ki, bu da hər iki dövlətin maraqları baxımından olduqca əhəmiyyətlidir. Birgə media platformasının yardılması iki dövlət arasıdna münasibətlərin inkişafını yeni müstəviyə qaldırmaqla yanaşı, Azərbaycan və Türkiyəyə yönəlik düşmən qüvvələrin təxribatlarına daha tutarlı cavab verməyə əsas verəcək.

Mən bu şərəfli işdə Hikmət müəllimə uğurlar arzulayır, onun bu böyük, son dərəcə məsuliyyətli işin öhdəsindən laqiqincə gələcəyinə inanıram”.

Seymur ƏLİYEV