Rusiya Xarici Kəşfiyyat İdarəsinin rəisi Sergey Narışkin Qarabağ cəbhəsində baş verənlərə  münasibət bildirib. 

Moderator.az təhlükəsizlik məsələləri üzrə ekspert İlham İsmayıldan Narışkinin dediklərinə münasibət öyrənib. 

İlham İsmayılın cavabını diqqətinizə çatdırırıq.

“Rusiya kəşfiyyatı şefinin mövqeyi Rusiyanın mövqeyidir və biz əvvəlki yazılarımızda qeyd etdik ki, Rusiyanın indiki mövqeyi aldadıcı təsir bağışlamamalıdır. Rusiya guya Ermənistanı deyil, özünü bəhanə edib Qarabağda baş verənlərə müdaxilə etmək istəyir. Narışkinin mövqeyi bu baxımdan qərəzli olmaqla yanaşı, həm də ədalətsizdir. Narışkini (oxu Rusiyanı Türkiyənin  “ilk dəfə açıq və birmənalı şəkildə Azərbaycanın tərəfində olması” narahat edir. Əsas diqqəti “beynəlxalq terror strukturlarının” Qarabağa gəlməsinə yönəldən kəşfiyyat şefi bir sıra radikal islam quplaşmalarının guya münaqişə bölgəsinə gəlişini qeyd edir. Narışkin bildirir ki, “Cabhat ən Nusra”, “Firkat Hamza”, “ Sultan Murad” və ekstremist kürd qruplaşmaları Yaxın Şərqdən Qarabağa gəlib”. Narışkinin diqqətinə çatdırırıq ki, 32 ildir ki, Qarabağ müharibəsi gedir, indiyədək hansı radikal islam terror təşkilatının bir nümayəndəsi Qarabağa gəlib və ya kənardan da olsa dəstək ifadə edib? İkincisi, Azərbaycan din yolunda cihad elan etməyib, vətən torpaqlarının işğaldan azad edilməsi uğrunda mübarizə edir. Qərəzli olmaq isə açıq görünür. Narışkinin kürd ekstremist dəstələrinin də Qarabağa gəlməsi haqqında dedikləri sadəcə gülüş doğurur. İstər Suriyada, istərsə də Türkiyə ərazisində “ekstremist kürdlər” yalnız Türkiyəyə, bir də Azərbaycan türklərinə qarşı savaşırlar. Türkiyəni özünə düşmən elan edən istənilən kürd ekstremistlərinin  Türkiyənin arxasınca Qarabağa gəlməsini, ancaq Rusiya məmuru deyə bilər. Narışkin Azərbaycana gəlib şəhidlərin siyahısına baxsın və görsün ki, torpaq uğrunda ölən gənclər hansı ölkənin vətəndaşlarıdır.

Və guya Narışkini narahat edən, bu terrorçuların Ermənistan və Rusiya ərazilərinə keçid etməsidir.  Cənab Narışkinin yadına salmaq istərdik ki, İŞİD-ə qoşulanlar içərisində ərəblərdən sonra say etibarı ilə çoxluq təşkil edən Rusiyanın Şimali Qafqaz bölgəsindən olan vətəndaşları olub. Bu təşkilatın nümayəndələri onsuz da sizin içinizdədir, biz tərəfdən olmayan adam sizlərə tərəf keçəsi deyil. Özünüzdəkilərdən qorxun, ehtiyat edin. 

Narışkinin qərəzli mövqeyi Rusiyanın məkrli planlarından xəbər verir. Biz zamanın darlığından maksimum istifadə edib, torpaqlarımızın işğaldan azad edilməsini sürətləndirməliyik”.