Bu dəfəki yazım Maştağa kənd sakini Əliağa Eldəniz oğlu Məmmədov haqqındadır. Əliağa Məmmədov indi ən uca şəhidlik zirvəsindədir. O hərbi xidmətdə olarkən qəhrəmancasına şəhid olub. Belə ki, döyüşdə düşmən minaatanlardan atəşə başlayıb. Əliağa minalardan birinin tabur komandirinin yanına düşəcəyini sezir, irəli atılır, komandiri yerə yıxır, vücudunu ona sipər edir. Mina partlayır, qəlpələr Əliağanın bədəninə sancılır. Əliağa canı bahasına komandiri xilas edir. Maştağadakı dəfn mərasimində tabur komandiri hücum əməliyyatında olduğuna görə iştirak edə bilmir. Amma o Əliağanın valideynlərinə telefonla ismarıc yollayıb, bunları deyir: “Övladınız məni həyatı bahasına xilas etdi, taburun hücumunun qarşısını almağa çalışan düşmənə mane oldu. Belə şücaəti, qəhrəmanlığı yalnız filmlərdə görmüşdüm, kitablarda oxumuşdum. Bu gün oğlunuzu itirsəniz də, məni oğul saya bilərsiniz. Cəbhədən qayıdan kimi oğul təki xidmətinizdəyəm. Həyatımı sizə borcluyam”..

Əliağa Məmmədov 255 saylı Maştağa kənd məktəbini bitirəndən sonra peşə məktəbinə daxil olub. O həm də bir müddət əvvəl Azərbaycan Dövlət Akademik Musiqili Teatrında işıqçı olaraq işə başlamışdı. Teatrın direktoru, Əməkdar İncəsənət xadimi Əliqismət Lalayev Əliağanın yüksək nizam-intizama sahib olduğunu bildirib:

“Əliağa cəmi bir neçə ay bizim teatrda işlədi. Peşə məktəbindən bizə praktikaya gəlmişdi. İşində çox məsuliyyətli idi. Az müddətdə işi o qədər dərindən öyrənmişdi ki, ona ancaq hər zaman “sağ ol” deyirdilər. Teatrı, səhnəni ürəkdən sevirdi. Hər kəs də onun xətrini çox istəyirdi. Əsgər gedəndə hamıdan soruşmuşdu ki, qayıdanda mən yenə də teatrda işləyə biləcəm? Biz onun yolunu səbirsizlikə gözləyirdik. Sən demə bu gözləmənin sonu yox imiş. Şəhid olan günü evlərinə getmişdik.. Hamı, böyük bir izdiham onu son mənzilə yola salmaq üçün gəlmişdi” deyə teatrın direktoru Moderator.Az-a bildirib.

Teatrın işıq sexinin rəisi Nicat Həmidov onunla sonuncu dəfə fevral ayının 2-də görüşdüyünü bildirib:

“Əliağa çox məsuliyyətli bir işçi idi. Gənc olmasına baxmayaraq mən böyük qardaş kimi ona bildiklərimi öyrətməyə çalışırdım. Nəyin düz olub olmadığını hər zaman ona başa salardım. Təsəvvür edin, günün bir günü gəlib çöldə məni gözləyib ki, rastlaşanda desin ki, mən işə qəbul üçün gəlmişəm. Teatrımızın direktoru Əliqismət Lalayevin qəbuluna getdim və hər şeyi ona danışdım. Direktorun mənə ilk sualı “Necə uşaqdır və işdən anlayışı varmı?” oldu. Mən də çox məsuliyyətli biri olduğunu dedim və o gündən iş praktikası başladı. Teatra praktikaya gələndə fikirləşdim ki, yəqin vaxt keçirməyə gəlib. Amma yanılmışdım.. İş yoldaşları Samir və Səbuhi ona hər şeyi öyrətmişdilər. İşıq sexində hamı onu balaca qardaşı kimi çox istəyirdi. Sonuncu dəfə fevral ayının 2-də məzuniyyətə gələndə görüşmüşdük. Teatra gəlmişdi, işi üçün çox darıxdığını deyirdi. Amma bir müddət sonra onun şəhidlik zirvəsinə ucaldığını öyrəndik” deyə işıq sexinin rəisi bildirib.

Akademik Musiqili Teatrın aktyor və rejissoru Zaur Əliyev də bir müddət əvvəl onunla birlikdə işıq sexində çalışdığını bildirib:

“Əliağa bizim teatra gələn günündən istiqanlılığı ilə hamının hörmətini qazanmışdı. İmkan verməzdi ki, kimsə iş görsün, can atırdı ki, nəsə öyrənsin. Nə vaxt nə xahiş edirdimsə heç vaxt etiraz etmirdi. Hərbi xidmətə gedəndə mənimlə sağollaşdı və dedi ki, inşallah teatra qayıdacam.. Əliağanın şəhid olmağını həmkarım Əmrah Dadaşov mənə bildirdi. Səhifələrdən birində şəkilini paylaşmışdılar, sözün düzü ilk gördüyüm an istəmədim ki, bu xəbərə inanım. İkimiz də çox pis olduq.. Daha sonra necə şəhid olduğunu bildim və yaşarkən onu daha yaxından tanımadığıma peşman oldum” deyə Zaur Əliyev bildirib.

Biz də Moderator.Az kollektivi olaraq şəhidimizin ailəsinə səbr arzulayıb, ruhu şad olsun deyirik!