Tanınmış tarzən Malik Mansurov da ölkə başçısı tərəfindən Xalq artisti fəxri adına layiq görülüb. 

M.Mansurov Moderator.az-a açıqlamasında öz xoş təəssüratlarını bölüşüb və ən başlıcası qələbəmizə görə sevindiyini bildirib:

“Təbrikiniz üçün çox sağ olun. İlk öncə hamı kimi qələbəmizə görə qürur hissi keçirirəm, sevinirəm. İki əsrdən çoxdur ki, bu mübarizə davam edirdi və itirdiklərimiz də olmuşdu. İndi onun artıqlamasıyla əvəzi çıxır. Hətta çox gözəl xəbərlər gözləyirik. Bu gün bizim şəhidlərimiz, qazilərimiz var, onlar hamısı bizim övladlarımızdır. Mənim oğlum da müharibədə iştirak etdi və hazırda əsgəri xidmətini davam etdirir. Bu hisslərin içində ölkə başçısı tərəfindən Xalq artisti fəxri adına layiq görülməyimə görə çox sevindim. Bu mənim çoxdan gözlədiyim bir xəbər idi və həm də bu sürpriz oldu. Başda qalib prezidentimiz olmaqla, bu işdə əməyi keçən əlaqədar təşkilatlara  təşəkkürümü bildirirəm. Cənab prezidentin belə bir məqamda vaxt tapıb bizə diqqət göstərməsi bizi çox sevindirdi. Bu bizim məktəbin 20 illik münasibətilə əlaqədar idi və bir çox sənət yoldaşlarım da fəxri ada və medallara layiq görüldülər. Əlbəttə, biz kollektiv olaraq çox sevinirik və bu sevincin içində bizim şəhidlərin yası var. Ona görə bir gözümüz gülür, bir gözümüz isə ağlayır”.

Malik Mansurovun qardaşı Elşən Mansurov da kamança ifaçısıdır və o, da ölkə başçısı tərəfindən Xalq artisti fəxri adına layiq görülüb. O, musiqi sahəsinə gəlmələrinin atasının təşəbbüsü olduğunu bildirib:

“Təbii ki, hamıdakı kimi bizdə də bu valideynlərdən gəlib. Atam melorasiya sahəsində mühəndis olub. Musiqi sahəsinə gəlməyimiz onun tara olan böyük məhəbbətinin nəticəsidir. Biz də təbii ki, bu sahəyə sevinə-sevinə getmişik”.

Xalq artisti koronavirusun tədris sistemini bərbad vəziyyətə saldığını deyib:

“Mənim səhhətimdə başqa problemlərim var idi və ona görə müalicə olunurdum. Bəlkə də o məni koronavirusdan xilas etdi. Amma çox təəssüflər olsun ki, tədris çox pis vəziyətə düşdü. Koronavirusdan qorunmalıyıq, dövlətin qərarları var və buna riayət etmək hər birimizin borcudur. Amma muğam dərsləri mütləq canlı olmalıdır. Təəssüflər olsun ki, bu alınmır. Arzu edirik ki, əvvəlki günümüzə qayıdaq. Konsertlər də yoxdur və buna görə çətinliklər yaranıb. Amma bütün bunlara dözməliyik”.