Son Qarabağ savaşında Azərbaycan tərəfindən məğlub edilmiş Ermənistan siyasi, hərbi və iqtisadi baxımdan məğlub və miskin durumdadır. Ancaq məlumdur ki, Sovetlər İttifaqı dağıldıqdan bəri ABŞ-da, bəzi Avropa ölkələri də regionda rollarını artırmaq, yeri gələndə Türkiyə və Azərbaycana, eləcə də Rusiya və İrana təzyiqlər etmək məqsədilə bu respublikanı Rusiya təsirindən tam çıxararaq öz “maşa”larına çevirməyə çalışırlar. Və bu müstəvidə on illərdir ki, əsasən Vaşinqton və Moskva arasında mübarizə gedir. 2018-ci ilin aprel ayında Qərbin birdən-birə Ermənistanda “demokratiya” yaratmaq fikrinə düşərək Paşinyanı hakimiyyətə gətirməsi də Ermənistan ərazisindən İrana və Rusiyaya qarşı platsdarm kimi istifadə etmək planının tərkib hissəsi sayıla bilər.  

Məlumdur ki,  zəlil durumda olsa da, qəsbkar Ermənistanın  hazırkı baş naziri N.Paşinyan qərbpərəst, ABŞ milyarderi “Soros”un adamı  hesab olunur. Bu amil rəsmi Vaşinqtonun Ermənistana münasibətində hansı rol oynayacaq? Ola bilərmi ki, Paşinyan hakimiyyətini qoruyub-saxlamaq və Ermənistanın “qulp”unu öz əlinə keçirmək məqsədilə ABŞ-ın yeni seçilmiş prezidenti Cozef Bayden administrasiyası Qarabağdakı ermənilərə “status” verilməsi və s. məsələlərdə Azərbaycan dövlətinə təzyiqlər göstərsin?..   

Mövzu ilə bağlı Moderator.az-ın suallarını cavablandıran Azərbaycan Demokratik İslahatlar Partiyasının sədri, Milli Məclisin deputatı Asim Mollazadə belə deyib:

“Bilirsiz, söhbət konkret Ermənistan hökumətindən getmir. Çünki bu ölkə, xüsusən Azərbaycan tərəfindən məğlub və miskin bir hala salındıqdan sonra bölgədə hansısa bir təsir imkanlarına malik deyil. Söhbət çox zəngin, güclü və təşkilatlanmış xarici ermənilərdən gedir. Onlar Amerikada, Fransada, Cənubi Amerikada və s. yerləşir. Və onların qurduğu lobbilərin bütün iş və  siyasəti məhz irqçilik, faşizm, türkə nifrət ideologiyası üzərində qurulub. Onlar günü sabah Güney Qafqazda yaşayan bütün erməniləri öz maraqlarına qurban verməyə hazırdırlar ki, sonradan yenidən bu məsələdən Azərbaycan və Türkiyəyə qarşı növbəti qondarma “soyqırım”, “genosid” təzyiqləri üçün istifadə edərək özləri üçün pul yığsınlar. Və əksinə, Qərb də, ABŞ da erməni lobbilərindən öz maraqları üçün yararlana bilər. Söhbət bundan gedir. Ona görə də Ermənistan hökumətinin varlığı,  yoxluğu, onun başında duranın haranın adamı olması məsələlərinin erməni  lobbilərinə aidiyyatı yoxdur, onlar öz öyunlarını oynamaqda davam edirlər... Onu da deyim ki, xaricdəki belə təşkilatlanmış ermənilərin sayı Ermənistandakıların sayından qat-qat çoxdur. Və əlbəttə, onlar Bayden administrasiyasına təsir göstərməyə çalışırlar və çalışacaqlar..." 

Parlament üzvü fikrinin davamında Azərbaycan dövlətinin mümkün təzyiqlərdən özünü müdafiə etməyə kifayət qədər imkanı olduğunu da dilə gətirib.

"Onu da deyim ki, ümumiyyətlə, indiki dövrdə Azərbaycana hər cür təzyiqlər ola bilər. Söhbət ondan gedir ki, həmin təzyiqlər vasitəsilə təlqin olunmağa çalışılan təklifləri kim qəbul edir.  Özünü müdafiə etməyə kifayət qədər imkanları olan Azərbaycan dövləti... Ona görə də  ABŞ tərəfindən də ermənilərə Qarabağda hansısa status verilməsi istiqamətində təzyiqlər olsa belə, bunun düşmənlərimiz üçün heç bir müsbət nəticəsi olmayacaq...” –deyə A.Mollazadə vurğulayıb.

Sultan Laçın