“Bundan sonra  olayların inkişafını izləmək lazımdır; görək, bu, sadəcə, bir aksiya olacaq, yoxsa getdikcə daha da genişlənən nəhəng bir demokratik prosesə çevriləcək. Bu isə çoxsaylı faktorlardan asılıdır. Zənnimcə, xarici və daxili amilləri nəzərə alsaq, proses getdikcə genişlənəcək və dərinləşəcək...” 

Bu fikirləri Azərbaycan Atlantik Əməkdaşlıq Assosiasiyasının prezidenti, politoloq Sülhəddin Əkbər Moderator.az-ın Rusiyada müxalif lider Aleksey Navalnının həbs olunmasıyla bağlı son kütləvi etiraz aksiyalarının mümkün nəticələri haqda suallarına cavab verərkən söyləyib.

“Navalnı ilə bağlı etirazların nəticələri gözlənildiyindən də müsbətdir. Rusiyanın öz ekspertləri də bu aksiyalardan öncə rəylərini bildirmiş və çoxları skeptik, bədbin yanaşmışdılar. Yəni belə kütləvilik gözləmirdilər...  

Putin rejiminə qarşı bəhs edilən etirazların nəticələri diqqətimi 3 baxımdan cəlb etdi. Birincisi, aksiyaların Vladivostokdan Kalininqrada qədər 100-dən çox şəhərdə keçirilməklə bütün Rusiyanı əhatə edəcək bir miqyasda olması. İkincisi, kütləviliyi, yəni etirazlara gözlənildiyindən daha çox adamın qatılması. Üçüncüsü, aksiyaların yüksək energetikası, yəni iştirakçıların dönməz əhval-ruhiyyəsi. Bu 3 parametrdən yanaşdıqda hadisələrin inkişafını müsbət qiymətləndirirəm. Və belə çıxır ki, rus ekspertlər öz rəylərinə yenidən baxmalı olacaqlar...

Bundan sonra isə olayların inkişafını izləmək lazımdır; görək, bu, sadəcə, bir aksiya olacaq, yoxsa getdikcə daha da genişlənən nəhəng bir demokratik prosesə çevriləcək. Bu isə çoxsaylı faktorlardan asılıdır. Zənnimcə, xarici və daxili amilləri nəzərə alsaq, proses getdikcə genişlənəcək və dərinləşəcək...”

“Getdikcə genişlənən bu cür etirazlar, eləcə də ölkədə daxildən və xaricdən körüklənən digər  problemlər qarşısında Putin hakimiyyətinin çıxış yolu nədədir?” sualını isə Sülhəddin Əkbər belə cavablandırıb:

“Hesab edirəm ki, hakimiyyətin çıxış yolu üçün iki əsas seçimi var. Putin ya rejimi daha da sərtləşdirməli, repressiyaları daha da artırmalıdır. Ya da yeni bir demokratik açılım edərək islahatlara getməlidir. Fikrimcə, Kreml birinci variantı seçəcək. Ən azı, ilk dövrdə...”

Sultan Laçın