“Maddi vəziyyətim çox çətindir, dolanışıq demək olar ki, yox dərəcəsindədir. Artıq bir ildən çoxdur ki, pandemiya ilə bağlı olaraq işlər rəsmi olaraq dayandırılıb. Müğənnilərin, musiqiçilərin gəlir yerləri bilirsiniz ki, el şənlikləridir, toy məclisləridir. Onlar da olmadığı müddətdə demək olar ki, müğənni, musiqiçi heç cür dolana bilmir. Biri var sən tək olasan, biri də var ailə ilə. Dövlətdən aldığım məvacib də yalnız evin kommunal xərclərinə çatır, heç o da çatmır. Sağ olsunlar, arada müəyyən dostlarım, sənət yoldaşlarım, qohumlarım kömək edirdilər, artıq hamıda vəziyyət çətin olduğu üçün heç kimə ağız açmaq olmur. Allah köməyimiz olsun, tezliklə bu bəla, müsibətlər başımızın üstündən çıxıb getsin, biz də qaldığımız yerdən işimizə davam edək, öz ruzimizi əldə edək. Hər halda sənətçilər, müğənnilər üçün aidiyyatı qurumlar tərəfindən hansısa ölçülər götürülməlidir ki, bizim də güzəranımız nisbətən yaxşılaşsın”

 

Bunu Moderator.az-a açıqlamasında tanınmış müğənni Nurlan Əzizbəyli deyib. Sənətçi daha sonra 36 ildir sənətdə olduğunu bildirərək diqqətdən kənarda qaldığını deyib.

“Mənim əziz bacım, millət vəkilimiz Qənirə xanım Paşayeva vasitəsilə qəzalı vəziyyətdə olan evim dövlət tərəfindən təmir olunur. Mən ona öz dərin təşəkkürümü bildirirəm. Bu günki gündə biz evimizin təmiri bitənə qədər kirayədə yaşayırıq, amma dolanışığımız çox çətindir, heç bir yerdən gəlirim yoxdur. Mən heç vaxt ağlamağı sevməmişəm, amma bu acı bir reallıqdır. Siz bilirsiz ki, mənim səhhətimdə də müəyyən problemlər oldu, şükür indi yaxşıyam, amma yəqin ki, bu cür fikir və stresslə çox çəkməz. Mən sizin Moderator.az saytı vasitəsilə Mədəniyyət Nazirliyinə, Milli Məclisdə Mədəniyyət komitəsinin sədri Qənirə xanıma bir daha müraciət etmək istəyirəm ki, mən uzun illərdir Dövlət Akademik Filarmoniyasında solist kimi fəaliyyət göstərirəm,  amma maaşım çox aşağıdır. O boyda Musiqi Akademiyasını fərqlənmə diplomu ilə bitirmişəm, buna baxmayaraq  yarımştat işləyirəm, üstəlik kateqoriyam da aşağıdır. Bilirsiz ki, müəyyən dövlət işləri var ki, orada kateqoriyalar qalxdıqca maaşlar da qalxır. Bu olarsa mənim də dolanışığım az da olsa düzələr. Artıq 36 ildir ki, professional səhnədəyəm, tanınmış sənətkarlardan dərs almışam, uşağlığımdan bəri ölkəmizin adını layiqincə təmsil edib, birincilik qazanmışam. Buna baxmayaraq heç bir fəxri adım yoxdur, dövlət tərəfindən mükafatlara layiq görülməmişəm. 1985-ci ildən 8 yaşından böyük səhnələrdəyəm, ifamda səslənən bir çox mahnılar radio və televiziyanın qızıl fondunda saxlanılır. O vaxt bir dövlət telekanalımız var idi, hətta bəzi verilişlər var idi ki, açılışını mən edirdim, hər gün çıxışlarım olurdu. Bu gün yerli telekanallar da məni ara-sıra yada salır. Üzdəniraq, sənətdən anlayışı olmayan müğənnilər kimi hər gün efirlərdə, ekranlarda görünmürəm. Mənim üçün də tamaşaçılarım, dinləyicilərim çox darıxır. Mən də tamaşaçılarımla ünsiyyətdə olub, öz sənətimi davam etdirmək istəyirəm. Bilirsiz ki, yaradıcı insan yalnız fəaliyyətdə olarkən stimul qazanır, həm də tamaşaçılarını, dinləyicilərini sevindirir. Amma bu olmadığı halda biz də küsürük, inciyirik, özümüzə qapanıb, sınırıq. Yəqin ki, Allah bir gün bizim də üzümüzə qapı açar və bəxt, tale üzümüzə gülər” deyə müğənni bildirib.