Bunu Moderator.az-a açıqlamasında Şuşa özünümüdafiə batalyonunun sabiq komandiri Fəxrəddin Səfərov deyib. F.Səfərov Şuşa torpağın gətirərək şəhidlərin məzarına səpdiklərini bildirib:

 

“Noyabrın 8-də Daşaltı kəndində, dekabrın 26-da isə Şuşada oldum. Ordan torpaq gətirdim. Şəhidlərimizin məzarına səpmək və bir də müraciət edən valideynlərə vemək üçün Şuşa rayon İcra Hakimiyyətinə göndərdim ki, ordan paylaşdırsınlar. Birinci Şuşa torpağını Bakıya mən gətirdim. Onda icra başçımız Bayram Səfərova zəng vurub  Şuşanın azad olunması xəbərini çatdırdım. O, da dedi ki, buna görə sənə mükafat verəcəm. 

 

Şuşada bir çox tarixi binalar ermənilər tərəfindən dağıdılıb. Mədəniyyət evi var idi, onu da dağıdıblar. Xurşidbanu Natəvanın sarayı da yandırılıb. Yolların ətrafında özlərinə bina tikiblər. Amma böyük məktəbimiz var idi, o da yoxdur. 3-nömrəli internat məktəbini söküb yerində parlament binası tikiblər. Şəhərin bir çox yerlərin gəzdim. Bakıda ilin  bütün aylarında tikinti aparmaq olur, amma  Şuşada sentyabrdan may ayına kimi tikinti aparmaq mümkün deyil. Çünki orda hava çox soyuq olur deyə tikinti aparmaq olmur. Şuşada dövlətin mənə verdiyi ikiotaqlı evimə baxdım orda əsgərlərimiz yaşayır. O evə də yaxın özüm böyük bir şəxsi ev tikdirmişdim. Orda da əsgərlərimiz olur və onları orda görüb sevindim. Amma evin mənim olduğunu deməyə utandım. O evdə heç yaşamadım, Şuşa işğal olundu və biz çıxdıq. Bizdən sonra ermənilər evin içində dəyişiklik edərək oranı uşaq bağçası ediblər. 

 

 Şuşa qeyri-adi bir yerdir. Ali Baş Komandan da dedi ki, Şuşadan ayrılmaq olmur. İnşallah o yerlərə getmək sizlərə də qismət olar. Hətta müharibə vaxtı mən çox çalışdım ki, biz köhnə döyüşçüləri də döyüşə cəlb etsinlər və bələdçilik edək. Bununla da itkimiz də az olardı. İndinin özündə də ermənilər revanş döyüşə hazırlaşırlar və köhnə döyüşçülərlə danışıb deyirəm ki, biz köhnə döyüşçülərdən də bir qrup formalaşdırsınlar. Yəni sabah döyüş olarsa, 19 yaşlı əsgərdənsə, mənim ölməyim yaxşıdır. Çünki o əsgər gəncdir. Belə arzularımız var, inşallah inanıram ki, ordumuz öz sözün deyəcək və qalan ərazilərimizi də bərpa edəcəyik”.