“Musiqiçilər çox əziyyət çəkir, bağlarını, evlərini, maşınlarını hətta musiqi alətlərini də satırlar. Bu qədər də olmaz da, qurban olum Allaha! Bizim işimizə də bir çarə tapsınlar da. Çörəyimiz musiqidən, bu sənətimizdən çıxır da. Başqa sənətimiz olsaydı dərdimiz də olmazdı. Avtobuslar, restoranlar işləyir bir dənə toylara qadağa qoyublar, başım çıxmır niyə? Gizlin də toy edən var, aşkar da. Moskvada, Rusiyada toylara icazə verirlər, bizdə niyə olmaz?”

 

Bunu Moderator.az-a açıqlamasında əməkdar artist, məşhur qarmon ifaçısı Gövhər Rzayeva bildirib. Sənətçi maddi vəziyyətinin heç də ürəkaçan olmadığını bildirib.

“Bizim də ailəmiz, övladlarımız, qohumlarımız var. İş orasında deyil ki, övladlarımızı evləndirmişik, hər kəsin öz ailəsi var, yenə də bir əlimiz onlardadır. Görün nə qədər ailə çörəksiz qalıb?! Tək olsaq pendir-çörəklə də dolanarıq. Allah deyib durmuşuq. Bir ay ərzində qaz, su, işığa nə qədər pulumuz çıxır. Bir gün gecikdirən kimi gəlib qapını döyürlər. Pensiya qalxmamış ərzaqların qiymətini qaldırırlar. Kasıb yazıq nə etsin, belə çıxır ki, evində ölsün də. Fikirləşirik ki, yığışıb haqq səsimizi çıxaraq, sonra da öz-özümə deyirəm ki, kimdir bizim səsimizə qulaq asan, səs verən? Gecə yatırlar, yuxuda nə görürlər o qadağanı tətbiq edirlər. İnsan adi qrip olan kimi həkim deyir ki, çıx açıq havada gəz. Yayda lazımdır ki, insanın ayağı quma, dənizə dəysin, vitamin d qəbul etsin. Hər yerdən məhrum ediblər bizi! Bizi öz əcəlimiz yox, qadağalar öldürəcək. Heç bilmirəm 70 yaşı görəcəm yoxsa yox?!  İtin ağzına buruntaq taxan kimi ağzımıza maska taxdırıb, buraxıblar küçəyə. Bu xəstəlik elə bil ki, sifarişlə 6-cı və bazar günləri gəlir” deyə musiqiçi bildirib.

 

Əməkdar artisti bir müddət əvvəl efirdə işlətdiyi “Pul qazanan kişinin xəyanətini bağışlamalısan” sözünə açıqlama da gətirib.

 

“Bir kişi ki, evdə qadının bütün problemlərini həll edirsə, o qadın çox xoşbəxt insandır. Niyə görə? Dükan-bazar bilmirsən, heç nəyin dərdini çəkmirsən. Bilirsən ki, sabah evdə çörək olmayanda bir dənə bulka ilə kişi girəcək qapıdan içəri. Bəs bizim kimi kişisiz qadınlar nə etsin? Bizim pənahımız, gümanımız bircə Allahdır. Allah bizə kömək olsun. Çox verib azdırmasın, az da verib düşmənə möhtac etdirməsin. Valideynin bir az imkanı olanda uşaqlar üstündə əsir, olmayanda isə uşaqlar onun qapısını da açmır. Bu da var da. Rəhmətlik nənəm deyərdi ki, “Haydı, duydu dəli idi, hər nə idi ərim idi”. Qapıdan içəri girəndə deyirdilər ki, kişidir” deyə əməkdar artist bildirib.