Azərbaycan Dövlət Dəniz Akademiyasının İnformasiya resurs Mərkəzinin müdiri riyaziyyat üzrə elmlər doktoru, dəniz naviqasiyası kafedrasının dosenti Rövşən Zülfüqar oğlu Hümbətəliyev Türk Dünyası Araşdırmaları İlimlər Akademisi Akademik üyesi seçilib. (Türk Dünyası Araşdırmaları Beynəlxalq Elmlər Akademiyasının akademik üzvü seçilib). Akademiyanın rəhbəri Prof. Dr. Hasan Ahmet və baş katibi Prof. Dr. Tuncay Paltanın 30 mart 2021-ci il tarixində Ankara şəhərində imzaladıqları qərara əsasən (A/ü -158) Rövşən Zülfüqar oğlu Hümbətəliyev müvafiq diplomla və elmin tərəqqisində göstərdiyi xidmətlərə görə həmin Akademiyanın “Qızıl Ulduz” medalı ilə təltif olunub. Qeyd edək ki, Rövşən müəllim bundan əvvəl elmi fəaliyyəti ilə əlaqədar olaraq 2015-ci ildə Beynəlxalq Pedaqoji Elmlər Akademiyasına müxbir-üzv, 2016-cı ildə Nyu York Elmlər Akademiyasına, Beynəlxalq Təbiətşünaslıq Akademiyasına, Avropa Təbiətşünaslıq Akademiyasının Şotlandiya və İngiltərə bölmələrinə, 2017-ci ildə Rusiya Təhsilin İnformatizasiyalaçdırılması Akademiyasına, 2019-cu ildə Rusiya Təbiətşünaslıq Akademiyasına, Rusiya Dağ Elmləri Akademiyasına və 2020-ci ildə isə Avropa Təbiət Elmləri Akademiyasına həqiqi üzv seçilmişdir. Onun nailiyyətləri arasında Lomonosov, Uşinski, Avropada keyfiyyət, Nyuton, Leybinis, tədrisdə novatorluğa görə qızıl medallar, A.Velikiy və Y.Velikaya ordenləri və Rusiya Təbiətşünüslıq Akademiyasının Avropa Elm Mərkəzi ilə birgə təsis etdiyi Əməkdar Elm və Texnika xadimi fəxri adı var. 

 

Türk Dünyası Araşdırmaları Beynəlxalq Elmlər Akademiyası 26 ildən çoxdur ki, uğurla fəaliyyət göstərir və qarşıya qoyduğu məqsədlərin əldə olunmasına öz töhfəsini verir. Akademiyanın məqsədlərindən əsası Türk dilli ölkələrin müxtəlif sahələrdə çalışan tanınmış alimlərinin mədəniyyət, elm, tarix, təhsil, ədəbiyyat, dil və digər istiqamətlərdə əldə etdikləri önəmli nəticələri üzə çıxarıb onları dəyərləndirmək, türk dünyasında tanıtmaq və onlar arasında işbirliyi qurulmasına yardım etməkdir.

 

Qeyd edək ki, Rövşən Hümbətəliyev ölkəmizin tanınmış riyaziyyatçı alimi və pedaqoqudur. O, 2000 elmi işin, o cümlədən 30-dan çox kitabın müəllifidir. Onun elmi əsərlərinin 54-ü xarici ölkələrdə (ABŞ, keçmiş SSRİ, Rusiya, Ukrayna, Türkiyə, Almaniya, Bolqarıstan və s.) nüfuzlu beynəlxalq xülasələndirmə və indeksləmə sistemlərində nəşr olunmuşdur.

 

Dr.Rövşən Hümbətəliyev Türk Dünyası ölkələrinin universitetləri və riyaziyyatçı alimlərilə uzun illərdir ki, əməkdaşlıq edir. O, dəfələrlə Ulusal Elmi Konqreslərdə elmi məruzələr etmişdir.