“Bitboks-hər hansı musiqi alətindən istifadə etmədən ağız, dodaq, dil və əllərin köməyi ilə musiqi yaratmaq sənətidir. Bitboks sözünün mənası musiqi qutusu deməkdir. Bu sənət ölkəmizdə populyar olmasa da, bitboksla məşğul olan bir neçə insan var. Əslində bitboks sənəti bir istedaddır, amma mən bunu hobbi kimi istifadə edirəm. Əsl sənətim Akademik Musiqili Teatrda balet artistidir”

 

Bunu Moderator.az-a açıqlamasında bitboksçu Yaqub Bəhramov deyib. Bitboksçu daha sonra əlavə edib.

 

“İlk bitboksumu 7-ci sinifdə oxuyarkən etmişəm. Yadımdadır, yutubda bir verilişdə gördüm ki, bitboks edirlər. Çox marağlı gəldi, həvəsləndim, hər gün çalışırdım, amma alınmırdı, səsləri çıxararkən ağzım ağrıyırdı, problemlərim olurdu, məşq etdikcə  praktika qazandım və daha sonra alındı. Ilk bitboksu edəndə evdəkilər dedilər ki, o səs telefondan gəlir, yoxsa sən çıxarırsan? Hamı təəccüblənmişdi. İlk istifadə etdiyim musiqi sadə bitboks idi. Gördüm ki, məndə alınır və daha sonra yeni musiqilər ağzım vasitəsilə yaratdım. Əslində bitboksu hamı edə bilər, çox da çətin sənət deyil, amma problemləri də çox olur, məsələn çox çalışanda çənə əzələlərimiz ağrımağa başlayır, bu mənə çətinlik verir. Həvəsiniz varsa, çalışsanız bacaracağsız, həvəsiniz ölsə, heç nə alınmayacaq. Elə hərəkət var ki, çox ağrı verir, məsələn, ağzım keyiyir, dodağım şişirdi. Ona görə də bu çətindir, amma məşq etdikcə dil yerinə oturur, hər şey rahatlıqla alınır. Adətən o mahnıları bitboks edirəm ki, melodiyası mənə tanış gəlir. Musiqinin ilk melodiyasına baxıram, səsinə baxıram, melodiyası yaxşıdırsa çalışıram ki, özüm də bacarım edim bunu. Təbii ki, hər bir musiqi üzərində bitboks etmək olar, lakin buna görə çalışmaq lazımdır, zaman lazımdır, istəyəndə yaxşı alınır.

 

Yaqubun ən böyük istəyi isə xarici ölkələrdə keçirilən bitboks yarışlarında iştirak etməkdir.

 

“Azərbaycanda bitboks bir o qədər də inkişaf etməsə də, Fransada, Amerikada bu çox məşhurdur. Həmin ölkələrdə bu sənət üzrə yarışlar keçirilir, qaliblər seçilir. İstərdim orada yarışlara qatılım. Amma öz ölkəmdə hələ ki, bu sənətlə hibbi kimi məşğulam. Gələcəyinə bilmək olmaz” deyə müsahibimiz bildirib.