*** ***

“İşğaldan azad olunmuş Kəlbəcərin Susuzluq kəndinə gedən yolda 3 soydaşımızın həlak olması, 4 nəfərimizin yaralanması, əlbəttə, çox üzücü xəbər oldu. Allahdan şəhidlərimizə rəhmət, yaralılarımıza şəfa diləyirəm. Minalardan söz düşmüşkən, öncə onu deyim ki, 1-ci Qarabağ müharibəsi zamanı döyüşlərin qızğın çağında bəzən biz özümüz də müəyyən əraziləri minalayarkən formulyarları tərtib etməyə vaxt tapmırdıq. Reallıq budur ki, o dövrdə erməni hərbçilər də bizim kimi bir sıra minalı sahələrin xəritələrini tərtib etməyiblər”. 

 

Bu fikirləri Moderator.az-a açıqlamasında səsləndirən 1992-1994-cü illərdə Kəlbəcər və Laçın rayonlarının Ermənistanla sərhədində, eləcə də Murovdağ istiqamətindəki döyüş əməliyyatlarında  fəal iştirak etmiş keçmiş tabor komandiri, istefada olan mayor Gəray Əsədov  söhbətinin davamında belə deyib:

 

“Ancaq artıq hər iki tərəfdən 1990-cı illərə nisbətən daha nizamlı və daha çox texniki imkanlara malik  ordunun vuruşması baxımından son 44 günlük savaşda həm ermənilərin ilk müdafiə xətlərində, həm də geri çəkilərkən, əraziləri tərk edərkən basdırdıqları minaların əksəriyyətinin formulyarları, sözsüz ki, tərtib olunub. Bunu bu günlərdə onların komandirlərindən biri də etiraf etdi. Ona görə də hansı yolla olursa-olsun, Ermənistan mina xəritələrini Azərbaycana  təhvil verməyə məcbur edilməlidir. Çünki söhbət hərbçilərimizlə yanaşı, dinc sakinlərin həyatından, taleyindən gedir...” 

 

I Qarabağ savaşının iştirakçısı məşhur Murovdağ əməliyyatı zamanı ermənilərin Kəlbəcərə gedən yolları minalamaq cəhdlərindən də bəhs edib.

 

“Kəlbəcərdə 3 soydaşımızın həlak olmasına səbəb olmuş mina partlamamışdan öncə avtomobildəki video-kamera vasitəsilə  çəkilmiş görüntülərdən isə onun yaxın müddətdə basdırıldığı bəlli olur. Bu, açıq diversiyadır. Yaxşı olar ki, əraziyə mülki şəxslər gələndə mühəndis-istehkamçılar işlək yolları belə, bir daha  yoxlasınlar…  

 

O vaxt 1993-1994-cü illərdəki Murovdağ əməliyyatı zamanı  Susuzluqda da olmuşdum. Bu kənd Daşkəsən istiqamətindən – Böyük Hinaldağ zirvəsindən enəndə   Murovdağın şimal yamacında yerləşir. Yadımdadır ki,  Murovdan aşağı düşəndə  bizim yolları qardan təmizləyən və genişləndirən böyük buldozerlər minaya düşmüşdü. Yaxşı ki, canlı itki olmamışdı... Kəlbəcərin Yanşaq kəndi istiqamətindən hücuma keçəndə isə gördük ki, ermənilər yolun kənarına yüzlərlə mina toplayıblar. Ancaq bizim hücumlarımız qarşısında onları basdırmağa vaxt tapmayıb qaçmışdılar... Yəni bilmək lazımdır ki, düşmənimiz çox namərd xislətlidir. Və nəinki aktiv əməliyyatlar dövründə, eyni zamanda indiki atəşkəs və gələcək sülh dövründə də xain təxribatlarını davam etdirə bilər. Bu səbəbdən istər hərbi, istərsə də mülki qurumların hər biri üzərinə düşən vəzifələri yüksək məsuliyyət və peçəkarlıqla icra etməlidir...   

 

Onu da deyim ki, Ermənistanla sərhəddə yerləşən  Kəlbəcər və Laçın rayonları  geniş və mürəkkəb relyefə malik bir ərazidir. Və sərhədlərimiz tam bərkidilib bağlananadək, Qarabağdakı bütün erməni hərbi birləşmələri çıxarılanadək  belə hadisələr gözlənilir. Odur ki, həm piyada, həm də avtomobildə gedən şəxslər maksimum ehtiyatlı olmalıdır”- döyüşçü mayor vurğulayıb.

 

“Onu da nəzərə almaq lazımdır ki, 30 ilə yaxın müddətdə davam etmiş işğaldan sonra 44 günlük savaşda böyük uğur qazansaq da, bundan sonrakı işlərin də miqyası çox böyükdür və bunları qısa müddətdə həll etmək mümkün deyil. Ona görə də dövlətimizin ağıl və təmkinlə işlərini davam etdirərək işğaldan azad ərazilərdə tam təhlükəsizliyi təmin etmək və məskunlaşdırma işlərini sona çatdırmasına səbirlə yanaşmaq gərəkdir”- deyə keçmiş komandir bildirib.

 

Sultan Laçın