Balıqların kütləvi tələf olmasına səbəb suda yaranan ciddi temperatur fərqidir.

Bu sözləri Oxu.Az-a açıqlamasında AMEA Zoologiya İnstitutunun dosenti, biologiya üzrə fəlsəfə doktoru Süleyman Süleymanov Hövsan qəsəbəsində, Qum adası deyilən yerdə balıqların kütləvi tələf olması ilə bağlı yayılan videoya münasibət bildirərkən deyib. 

O bildirib ki, son günlər hava şəraitinin çox isti keçməsi səbəbindən balıqlar tələf olub:

“Son 4 gün ərzində havada temperatur yüksəlib. Balıqlar suyun dərin qatlarından sahilə tərəf kürü qoymağa gəlir. Adətən bu proses aprel ayından başlayır. Birdən temperatur qalıb və oksigen çatışmazlığından balıqlar tələf olub. Adətən bu hadisələr avqust ayında olur, lakin bu dəfə tez olub. Bənzər hadisələr Xəzərin başqa hissələrində də qeydə alınıb”.

O qeyd edib ki, balıqların tələf olmasının suyun çirklənməsi və hər hansı zəhərli maddələr səbəbindən baş verməsi ilə bağlı səsləndirilən iddialar tamamilə əsassızdır.

Qeyd edək ki, hazırda Ekologiya və Təbii Sərvətlər Nazirliyinin nümayəndələri də ərazidədir və müvafiq monitorinqlər həyata keçirilir.

Ekologiya və Təbii Sərvətlər Nazirliyinin Bioloji Resursların Tədqiqat Mərkəzinin direktoru Mehman Axundov bildirib ki, Xəzər dənizində yay aylarında balıqların ölümü təbii bir prosesdir və yay mövsümündə suyun dayaz hissələrində balıqların ölümünü müşahidə etmək mümkündür:

“Hazırda ərazidəyik. Tərəfimizdən monitorinq və araşdırmalar aparılır. İlkin ehtimala görə, buna səbəb yay aylarında havanın temperaturunun qalxmasıdır. Belə ki, temperatur qalxır, suyun səviyyəsi, oksigenin həll olunmuş miqdarı aşağı düşür. Nəticədə bu cür mənzərə yaranır. Adətən bu proses iyul-avqust aylarında müşahidə edilir, lakin bu il istilər daha tez düşdüyündən indi baş verib. 

Ölən balıqların 90 faizi kefal, qalanları kütüm, siyənək, kilkə balıqlarıdır”.

11:08

Sosial şəbəkədə sahilboyu balıqların kütləvi şəkildə tələf olduğunu əks etdirən video paylaşılıb.

Oxu.Az xəbər verir ki, videonun Hövsan qəsəbəsində, Qum adası deyilən yerdə lentə alındığı qeyd olunub.

Paylaşımda iddia edilir ki, sahildən gələn kəskin qoxu səbəbindən dənizə yaxın durmaq olmur.

“Burada hər gün onlarla balıqçı yığışıb balıq tuturdu. Bu gün isə birdən-birə belə bir mənzərə yaranıb. Bunun səbəbi qısa zamanda araşdırılmalıdır. Böyük ehtimal, gecə ilə suya cərəyan verilib, iri balıqlar yığılıb, qalanları qalıb. Və ya suya nə isə töküblər”.