“İndiki çətin vəziyyətdə Azərbaycan kinosunun taleyinə görə o qədər də bədbin deyiləm. Proseslər gedir, bu çox qısa müddətdə başa çatan proseslərdir. Uzun müddət bu istiqamətdə işlər getməlidir, təmizlənməlidir, optimal idarəetmə variantları tapılmalıdır, вəyərli layihələr işə salınmalıdır”

 

Bunu Moderator.az-a açıqlamasında yazıçı Nəriman Əbdülrəhmanlı deyib. Yazıçı milli kino günündə təltif olunduğuna görə əməyi keçən şəxslərə öz təşəkkürünü bildirib:

 

“Yəni bu proses uzun müddət davam edəcək və ona görə də bədgüman olmağa həddən artıq ciddi əsas görmürəm. Qaldı ki, kinonun idarə edilməsində, kadrların hazırlanmasında, filmlərin istehsalata buraxılmasında da çatışmazlıqlar var. Əgər fikir versəniz, son illər Azərbaycan filmləri beynəlxalq müsabiqələrdə iştirak edirlər. Həm dövlət strukturları tərəfindən çəkilmiş, həm də müstəqil studiyaların filmləri beynəlxalq festivallarda uğur qazanır. Təbii ki, çətinliklər var və bundan sonra da olacaq. Ancaq həm dövlət, həm də müstəqil strukturlarda kinomuzun inkişafı naminə bütün güclərini sərf etsələr, məncə daha yaxşı nəticələr əldə edərlər.

 

Mən Azərbaycan Kinematoqrafçılar İttifaqının üzvüyəm və ittifaqımızda bizim görkəmli sənətkarımız Rüstəm İbrahimbəyovun başçılığı altında müxtəlif layihələr həyata keçirmişik. Bu layihələrdən biri “Azərbaycan kino ustaları” haqqında kitabların hazırlanması idi və ilk kitab çıxdı. Bu da böyük yazıçı, kinorejissor Həsən Seyidbəylinin yüz illiyinə həsr olunmuşdu. Bundan sonra dörd cilddə “Azərbaycan kino sənəti tarixi” çapdan çıxdı. Bunu da Rüstəm İbrahibəyov, Əlisa Cabbarov və mən ərsəyə gətirdim. Ondan sonra Azərbaycan kinosunun xronologiyasını bərpa etmək üçün “Rakurs” informasiya bülletenini artıq nəşrə hazırlayırıq. Burda da Azərbaycan kinosunun cari vəziyyəti haqqında məlumatlar dərc olunub. Bir sözlə, deyə bilərəm ki, müəyyən qədər tarixin yaddaşında qala bilən işlər gördük və bu zəhmətimi qiymətləndirən Rüstəm İbrahimbəyovun timsalında idarə heyətinin bütün üzvlərinə təşəkkür edirəm. İnanıram ki, gələcəkdə də yeni layihələr həyata keçirəcəyik”.

 

Qeyd edək ki, Azərbaycan Kinematoqrafçılar İttifaqı Kino Günü ənənəvi mükafatının qaliblərini elan edib. Azərbaycan Kinematoqrafçılar İttifaqının katibliyinin qərarına əsasən, 2021-ci il üçün İttifaqın ənənəvi mükafatına aşağıdakı kinematoqrafçılar təltif olunublar:

 

Emil Quliyev – “Pərdə” trilogiyasında sosial-mənəvi problemlərin uğurlu kino həllinə görə. Nəriman Əbdülrəhmanlı – Azərbaycan kino səlnaməsinin yaradılmasında xidmətlərinə görə. Hilal Baydarov  “Səpələnmiş ölümlər arasında” filmində obrazların  poetik vizual həllində uğurlarına görə təltif edilib.