“Ermənistanı və bütövlükdə erməni toplumunu “təbrik” etmək olar. Bunlar zatən hər zaman onun-bunun arxasında gizlənərək dünyada min hoqqalardan çıxdığını sübut etmişdilər. İndi də yeni bir “mübarək” addım atdılar. Açıq etiraf etdilər ki, bunlarda zərrə qədər qeyrət və şərəf deyilən nəsə qalmayıb”.

 

Musavat.com xəbər verir ki, hərbi ekspert, ehtiyatda olan polkovnik Üzeyir Cəfərov bu fikirləri Ermənistan sərhədlərini Rusiya hərbçilərinin qoruyacağı barədə yayılan rəsmi xəbərlərə münasibət bildirərkən söyləyib. Hərbi ekspert Ermənistanın faktiki olaraq öz müstəqilliyindən imtina etdiyini vurğulayıb: “Sadə dillə desək, ermənilər bu gedişlə yaxın illərdə nələri varsa, ona-buna ərməğan edib bölgədən qaçacaqlar. İndi də bu hoqqalarına nail oldular. Guya Azərbaycan Ermənistana dövlət sərhədində hansı təhlükələri yaşadırdı ki, bunlar öz formal da olsa, dövlət sərhədlərini qorumağı əzəli və əbədi vassalları olduqları rus hərbçilərinə tapşırdılar? Necə deyərlər, olsun. Bunun bizə zərrə qədər isti-soyuğu yoxdur”.

 

Rus hərbçilərinin Qazax rayonu ilə həmsərhəd Tavuş bölgəsinə yerləşdirilməsi fonunda İrəvanın davam edən təxribatlarına gəldikdə, Ü.Cəfərov qeyd edib ki, biz öz işimizi möhkəm qurmalı və düşmənə, onun havadarlarına əsla hansısa fürsəti verməməliyik. “Ermənistan tərəfinin indi etdikləri onların demək olar ki, bütün sahələrində - iqtisadiyyatından tutmuş, siyasətlərində, hərbi sahəsində olan bir xaotik idarəetmənin olmasının təkzibolunmaz işarələridir. Paşinyan artıq ikinci rəhbərliyi dönəmində ilk səhvini etdi. Əvvəllər erməni hoqqabazları seçildikdən sonra ilk səfərlərini sığındıqları Rusiyaya edirdilərsə, bu dəfə Paşinyan qonşu dövlətə, Tehrana üz tutdu. Yaxın günlərdə bunun “səsi” çıxacaq. Bu, hansı formada olacaq, onu yəqin görəcəyik”,-deyə Ü.Cəfərov əlavə etdi.

 

Polkovnikin sözlərinə görə, bundan sonra sərhəddə baş verən insidentlərin sayı da artacaq: “Edən biriləri olacaq, məsuliyyət daşıyan da olmayacaq. Ancaq Azərbaycan əsla narahat olmamalıdır. Biz öz vacib işlərimizi görməliyik, necə ki görürük, bu istiqamətdə heç bir narahatçılığımız olmamalıdır. Kim hansı addımı atacaqsa, cavabını da alacaq. Erməni düşünür ki, sülh müqaviləsindən yayınmaq üçün gündə bir hoqqa çıxaracaq, biz də susqun qalacağıq. Xeyr və əsla xeyr! 10 noyabr Bəyannaməsinin müddəaları tez bir zamanda yerinə yetirilməlidir!”

 

Polkovnik Cəfərov zəruri xatırlatma da etdi: “Aktiv döyüş əməliyyatlarının başa çatmasının 1 ilinə az qalır. Görülən işlərlə bağlı 3 tərəf hesabat açıqlayacaq. Ermənistan-Rusiya cütlüyü nə deyəcək? Nəticə 100 fazilik deyilsə, deməli, ən böyük məsuliyyəti Ermənistanla bərabər, Rusiya da öz üzərinə götürməlidir. Eqoist və iştahı günü -gündən artan bəzi şovinistlər isə mövcud vəziyyətdən o qədər də məmnun deyillər. Nüfuz onsuz da zədəli olduğu üçün bölgədəki mövcud duruma görə də cavab vermək lazım olacaq. Bir sözlə, Ermənistan istəyir Afrika cəngəlliklərindən indusları belə gətirib dövlətini ya dövlətçiliyini qorumaq istəsin. Biz öz haqq işimizi sona çatdırmalıyıq. Zaman da o zaman deyil, dünyada və bölgədə çox şeylər dəyişib və dəyişir”.