Bu gündən başlayaraq avqustun 20-nə qədər dünya ordularının, silahlanma mütəxəssislərinin, müdafiə sənayesi şirkətlərinin və bu sahələr ilə yaxından maraqlanan ekspertlərin diqqəti Türkiyənin İstanbul şəhərinə fokuslanacaq. Türkiyənin Milli Müdafiə Nazirliyinin ev sahibliyi ilə İstanbuldakı “Tüyap” Sərgi və Konqres Mərkəzində həyata keçiriləcək IDEF-2021 müdafiə sənayesi sərgisi məhz bu tarixdə fəalityyəti göstərəcək. İDEF-2021 sərgisi dünyada mövcud olan 32 hərbi sənaye sərgisi arasında iştirakçı sayına görə üçüncüdür. Sərgidə Türkiyə ilə yanaşı, 53 ölkədən müxtəlif şirkətlər təmsil olunacaq. Müxtəlif hərbi və ikili təyinatlı məhsulların nümayiş olunacağı sərgidə 79 ölkədən 154 rəsmi nümayəndədinin iştirakı gözlənilir. Azərbaycanın Müdafiə naziri Z.Həsənov da sərgidə iştirak edir. Sərgi zamanı müxtəlif səviyyəli görüşlərin keçiriləcəyi qeyd olunub. Sərgidə COVID-19 pandemiyası ilə bağlı bütün məhdudiyyətlər nəzərə alınaraq uyğun təşkil olunun, zəruri tədbirlər həyata keçirilib.

 

Bu il 15-ci dəfə keçiriləcək IDEF-2021 Beynəlxalq Müdafiə Sənayesi Sərgisində Azərbaycanın yeni məhsullarla təmsil olunacağı gözlənilir. Sərgidə birbaşa iştirak imkanım olmadığı üçün yerli məhsullarımız barədə məlumatlar əldə edildikdən sonra onlar barədə məlumat verə biləcəm. Məni bu sərgilərə dəvət etməyi zəruri hesab etməsələr də, əvvəllər olduğu kimi, bu dəfə də Azərbaycanın təqdim edəcəyi yeni məhsulların hər birinə aid ayrıca xüsusi məqalə təqdim edəcəyimə söz verirəm. Hələ ki, MSN-nin rəsmi səhifəsində sərgi barədə məlumata rast gəlinmir. 

 

Sərgidə iştirak edənlər və onu izləyənlər 21-ci əsrdə yeni nəsil müharibə aparmaqla möhtəşəm Qələbə qazanan Azərbaycan sənayesindən  yeni nəsil silahlı mübarizə vasitələrinin təqdim edəcəyini səbirsizliklə gözləyirlər. Və bu haqlı gözləntidir. 

IDEF-2021 sərgi salonu aşağıda adları çəkilən 6 əsas pavilyondan ibarət olacaq:
-    Quru vasitələri;
-    Dəniz vasitələri;
-    Aviasiya və kosmik vasitələr;
-    Nəqliyyat və daşınma vasitələri;
-    Təminat və təchizat vasitələri;
-    Təhlükəsizlik vasitələri.
Adı çəkilən pavilyonların hər biri özünə aid onlarla bölmədən ibarət olacaq. Sərginin ilk açılış günü rəsmi şəxslərin ziyarəti ilə müşaiyət olunacaq. Sonrakı günlərdə isə sərgiyə giriş bütün ziyarətçilər üçün sərbəst olacaq. 

Türkiyə şirkətləri bu sərgidə yeni atıcı silahlardan ağır “Altay” tankına, süni zəkaya əsalanan və “sürü” şəklində qarşılıqlı əlaqədə fəaliyyət göstərən pilotsuz hava və yerüstü vasitələrindən “Bayraktar TB3” PUA-sına, ağır “Akıncı”-dan TF-X qırıcısına, yüngül katerlərdən nəhəng desant gəmilərinə, yeni REM kompleksindən HHM vasitələrinə qədər geniş çeşiddə yerli və milli məhsullarla təmsil olunacaq.  Sərgidə Qarabağ Müharibəsində özünü müharibənin gedişatını dəyişmək imkanına malik silah sistemləri kimi praktiki olaraq təsdiq edən Türkiyə silahlarının tədarükü üçün çoxmilyonluq müqavilələrin bağlanması gözlənilir. 

Ədalət Verdiyev, hərbi ekspert