Milli Məclisin deputatı Əli Məsimli sentyabr ayının 27-də Şəki şəhərində təşkil edilmiş Vətən Müharibəsi Şəhidlərinin xatirəsinə həsr olunmuş anım tədbirlərində iştirak etmişdir.

 

Şəki şəhərində yerləşən Şəhidlərin Xatirə Kompleksində təşkil edilən tədbirdə çıxış edən Əli Məsimli I Qarabağ və Vətən Müharibəsi şəhidlərinə Allahdan rəhmət, onların ailə üzvlərinə səbr diləmişdir. O, qeyd etmişdir ki, Vətən torpağı uğrunda tökülən hər damla şəhid qanı biz azərbaycanlıların hər birimizin qanıdır. Şəhid anası hər birimizin anasıdır. Yaralanan döyüşçünün yarası hər bir azərbaycanlının yarasıdır.

 

Çıxışına davam edən Əli Məsimli bildirdi ki, Xocalı qətliamı da daxil olmaqla, xalqımıza qarşı törədilən soyqırımlar təkcə azərbaycanlılara yox, bütün bəşəriyyətə yönəldilmiş vandalizm aktıdır. 30 il davam edən beynəlxalq riyakarlıq ucbatından Dağlıq Qarabağ münaqişəsinin nizamlanması üçün aparılan danışıqların nəticəsizliyi Vətən Müharibəsinin başlanmasına səbəb oldu və biz işğal altında olan torpaqlarımızı hərbi –siyasi yolla azad etməyə müvəffəq olduq.

 

27 sentyabrdan başlayan Zəfər Yürüşü nəticəsində ermənilərin mifik röyası olan erməni tankları Bakıya gələcəkdir kimi arzusunu biz gerçəkləşdirdik və bu gün erməni tankları həqiqətən də Bakıdadır, amma Hərbi Qənimətlər Parkının eksponatı kimi sərgilənir. Əgər bundan sonra da Ermənistan təxtibatlara əl atsa, Zəfər Yürüşü davam edəcək.

 

Son 30 il ərzində Ermənistana milyardlarla dollar dəyərində pulsuz-parasız verilən silahların bir qismi indi Azərbaycanın Hərbi Qənimətlər Parkında muzey eksponatı olaraq sərgiləndiyi kimi, bundan sonra da onlara veriləcək silahlar da Hərbi Qənimətlər Parkında sərgilənəcəkdir.

 

Vətən Müharibəsi zamanı milli həmrəyliyin və vətənsevərliyin bariz nümunəsi kimi 44 günlük müharibədə Azərbaycan xalqı Ali Baş Komandanın ətrafında yumuruq kimi birləşib, tarixi qələbə çaldı, Şanlı Ordumuz 30 ilə yaxın düşmən tapdağı altında olan torpaqlarımızı işğaldan azad etdi. Qəhrəman hərbiçilərimizin şücaəti, rəşadəti hesabına, şəhidlərimizin qanı-canı bahasına bütün dünya Azərbaycanın tarixi zəfərinin şahidi oldu. Azərbaycan əsgərinin 27 sentyabrdan başlanan 44 günlük zəfər yürüşü haqq-ədalətin bərpa prosesi olmaqla yanaşı, həm də işğal altında olan torpaqların öz gücümüz və iradəmizlə azad edə biləcəyimizin mümkünlüyünü dünyaya göstərdi. Bu zəfərlə həm də xalqımız çoxəsrlik yaddaşını, kimliyini xatırlatdı, genlərində var olan cəsarətini ayağa qaldırdı, öz mənliyini bərpa etdi, səhidlərimizin qisası alındı.

 

Əli Məsimli çıxışının sonunda xalqımızın hər zaman 27 sentyabr – “Anım Günü”nü böyük ehtiram və hörmətlə yad edəcəyini, öz canı-qanı bahasına şanlı zəfər tarixini yazan Şəhidlərimizin əziz xatirəsini daim əziz tutacağını qeyd etdi.