Qalib - aciz insan. O, indi özünü Yer üzünün ən böyük "Söz sahibi" hesab edir. O, təbiətdə özündən fiziki cəhətdən ən böyük və ən kiçik nə varsa, hamısını ram edib - əzə bildiyini əzib, öldürdüyünü öldürüb, bəzilərinin hətta sonuncu üzvünə kimi nəslini kəsib, yerdə qalanlarını isə "laboratoriya siçanına" çevirib - hətta özünü də. Onun adı İnsandır. İndi o, özünə ən müxtəlif adlar qoyub, müxtəlif peşələr, əmək alətləri yaradıb, elmin, texniki tərəqqinin, biliyin gətirdiyi üstünlüklər onu Yer üzünün az qala Tanrısına çevirib: tiran, demokrat, humanist, aqil, müdrik, ateist, deist, dindar, mədəni, ictimai, etik və s. bunlar onun ayamalarıdır; bütün bu ayamalar onun qalxanı, yarada biləcəyi humanist - intellektual sipəridir, hər yerdə onun sivilizasion təntənəsi hiss olunur; Elm onu belə adlandırır: Homo Sapiens! Əzəmətli səslənir. Təbiətdən ayrılıb - Əzəmət simvolu - Sivilizasiya yaradıb! Qan və Sivilizasiya onun taleyi kimi görünür!!!

 

Bütün bu uğurlar onu məst edib, uğur o qədər böyükdür ki, o artıq, hətta intellektin sünisini, gen modifikasiyasını və s. yaradıb...

 

Ancaq görünən odur ki, o, qəbul etməsə də onun yaratdığı texnologiya, malik olduğu əzəmət - yaratdığı hər şey onu aciz bir duruma salmışdır. İndi hər şey-yaratdıqları onun məhvini sürətləndirir, lakin bu, heç onun vecinə də deyil, o yalnız döyüşməyi, ətrafındakılardan, Yerdən, Göydən nəyisə qoparmağa çalışır. Kədərli səslənsə də, Onun adı intellektual, qayğıdan məhrum aciz İnsandır!

 

Zəmanəmizin böyük filosofu K. Yaspers izah edirdi ki, müasir elm – “bu bitmək bilməyən proses bütün mənasıyla real mövcud olan və idrakda açılana doğru yönəlmişdir. Amma idrakın hədsiz artmasına baxmayaraq, o hər halda tamlığında varlığın əbədi quruluşunu dərk edə bilmir”. Biz də bu kimi fikrin tərəfdarıyıq ki, həqiqətən də biz istəsək də, istəməsək də texniki era kimi xarakterizə etdiyimiz hazırkı dövrdə çox “güman ki, tarixin dönüş nöqtəsinə yaxınlaşmaqdayıq”. Bu nöqtə “aydın dərrakə və xoş məram olarsa”, Yeni tarixin başlanğıcı, olmazsa onun – insanın, tarixin sonu da ola bilər.

 

***

 

Sonsuza qədər nikbin olmaq üçün ya dəli, ya həyatdan bixəbər, ya da müqəddəs olmalısan.

 

***

 

Biz öz fiziki xəstəliklərimizi müalicə etmək üçün hər cür vasitələrə əl atırıq; bu vasitələrsə bizim insani xəstəliklərimizi daha da dərinləşdirir, anlamırıq ki, fiziki xəstəliklərin səbəbləri, psixoloji travmalarımızdan - qurduğumuz münasibətlər sistemindən gəlir.

 

***

 

Biz yaxşı görünmək, mədəni təsir bağışlamaq, xarizmatik və s. ab-hava nümayiş etdirmək üçün ən müxtəlif çeşiddə geyimlər icad etmişik, üstəlik mədəniyyət adlı "mədəni" hərəkətlər sistemi yaratmışıq. Bunların hamısınınım yalnız bir adı var: maska.

 

***

 

Yeni texnoloji tərəqqi hər şeyi sürətləndirir, həm də insanı faş edir - mübhəm heç bir şey qalmır. Mübhəm olmayan bir şey qalmayacaqsa, utanmalı və çəkinməli bir şey də olmamalıdır?

 

***

 

Filosofun, ədibin, ədəbiyyatın, həqiqi elm adamının sağlam adam kimi yaşaması - düşünməsi fikrin epoxal xəstələnməsi deyilmi?

 

***

 

Koronovirusu ittiham edirik, olsun, Şeytan da Tanrı dərgahından qovulandan sonra daima ittiham olunur, halbuki bu, bizim daha da dərin - anlayan insan olmaq üçün verilmiş bir bəla və şansdır.

 

***

 

Dəhşət onda deyil ki, indi insanlar Yer kürəsini ovuc içi kimi özünkü etmək istəyirlər, faciə ondadır ki, indi hətta günəşin doğması da, batması da, yağışın yağması və təbiətin oyanması da siyasətdən asılı hala gəlmişdir: İdeologiyalar bəşəriyyəti məhvin astanasına gətirmişdir.

 

***

 

Filosofun, elm və din xadiminin simasında qəzəb, alternativlərə nifrət görəndə sonsuza qədər məyus oluram: indi dindarlıq partiyalılıq xarakteri alır, bu qorxulu tendensiyadır!

 

***

 

Sevgi də, tənhalıq da müqəddəsdir, birincidə həyat, ikincidə həyatın dərki gizlənir. Böyük sevgi tənhalıqdan keçir.

 

***

 

Həyat və Sevgi ən böyük şansdır.

 

***

 

44 günlük Vətən müharibəsi zamanı biz xalq olaraq sübut etdik ki, insani təbiətimiz sülh və humanizm fəlsəfəsinin mayası ilə yoğrulsa da varlığımıza və dövlətimizə təhdid olan bütün təcavüzləri əbədi olaraq dəf etmək iqtidarındayıq.

 

***

 

Onlar Bizim üçün, Vətən üçün həyatın ən qiymətli olan nemətini - canlarını qurban verdilər. Onlar 44 günlük Vətən müharibəsində Şəhid oldular, əbədiyyətə qovuşdular, biz onlara əbədi borcluyuq! Onlar Ali Baş Komandanın, Azərbaycan xalqının müzəffər qartalları idilər! Onlar Şər üzərində qələbə çalan Tanrının qılıncları idilər... Onlar Atillanın, Metenin, Toğrulun, Şah İsmayılın, Nadir Şah Əfşarın, Qacarın, Məmməd Əminin, XX əsrin nəhəng siyasi strateqi, müasir Azərbaycan dövlətinin dövlətçilik fəlsəfəsini yaradan Heydər Əliyevin nəvələri, tariximizin oyanan qan yaddaşı, şərin ram edilməsi üçün XXI əsr hərb sənətində yeni üsul, qayda, cəngavərlik nümunəsi yaradan Ali Baş Komandan İlham Əliyevin Dəmir yumruğu - polad qanadlı Qartalları idilər.

 

Onların şəhadətinin birinci ildönümüdür. Biz onların qazandığı amalları göz bəbəyi kimi qorumalıyıq. Ölkəmizi, Dövlətimizi, İnsanımızı, Qanunumuzu, Milli kimlik və bərabərliyimizi ən yüksək əzmlə qorumaqla onları əməlimizdə, qəlbimizdə varlığımızda yaşatmalıyıq!