“Tərtər işi”ndə bütün zərər çəkən, haqsızlıq görən insanları təbrik etmək istəyirəm. Ölkə başçısının tapşırığı əsasənda yeni istintaq qrupu yaradıldı. Necə ki, onun çağırışıyla zabiti yanında oldu. Buna bir hərbçi kimi çox sevinirəm. Baxmayaraq ki, dörd il bir hərbçi kimi çətinliklər yaşasam da, mənəvi, psixoloji əziyyətlər çəksəm də eybi yoxdur. Biz hərbçi, zabitik, vətənin övladıyıq, vətənimizin əziyyətini çəkməyi gözümüzə alıb, bu sahəyə yiyələnmişik. Bu gün Azərbaycan Respublikasının Baş prokuroru cənab Kamran Əliyevin istintaq qrupunu yaratmasına və bu qrupun tərkibində olan insanların 2017-ci il hadisələrində iştirak edən insanlar olmamasına sevinirəm. İstintaq qrupunun yaradılması və gələcək nəticələriylə bağlı məndə böyük ümidlər var. Çünki dəfələrlə bununla bağlı müraciətlər etsək də, səsimiz heç yerə çatmırdı. Mən haqq-ədalət istəyirdim, dövlətimlə, xalqımla bağlı heç bir narazılığım yoxdur. Bu vətəni ömrümüz boyu canımız bahasına qorumağa belə hazır olan insanlarıq, bu vətənin övladıyıq. Bu sözü dilimizə almışıqsa, əlbəttə ki, bir ömür boyu andımıza sadiq olacağıq. Bundan sonra gələcək həyatımızı yenə də vətənimizin, xalqımızın qorunmasına həsr etməyə hazırıq. Mənim şəxsən əziyyət çəkənlər arasında tanıdığım simalar var və onların da yerinə bu sözü deyirəm”

 

Bunu Moderator.az-a açıqlamasında kəşfiyyatçı, “Tərtər işi”ylə bağlı həqiqətləri tez-tez mətbuata açıqlayan Elmar Allahverdiyev deyib. E.Allahverdiyev “Tərtər işi”ndə iştirak edən adamların cəzalandırılacağına böyük ümid etdiyini bildirib:

 

““Tərtər işi”ndə əsas, icraçı və köməkçi qüvvələrdən danışmaq istəyirəm. Bu işin reallaşmasında onların böyük rolu olub. Bu işdə özləri də bilmədən əlləri bu cinayətin qanına bulaşmış qüvvələrimiz var. Bunu da nəzərə almaq lazımdır. Mən bu gün risk edib, xalqın qarşısında ölkə başçısına müraciətimi edirəmsə, demək mən ölümümü də gözümün önünə almışam. Məsələ 2017-ci ilin may hadisələrindən gedir. İnanıram ki, burda hansısa cinayətkarı bağışlamaq məsələsi ola bilməz. Kimliyindən asılı olmayaraq kimin bu işdə fəaliyyəti sübut olundusa, o qanun çərçivəsində ciddi cəzalandırılmalıdır. Mən artıq buna ümidliyəm, Azərbaycan Respublikası Silahlı Qüvvələrinin zabitiyəm. Ölkə başçısını aldat deyə məndən istifadə edən böyük bir qüvvələr Azərbaycan xalqının namus, qeyrət yeri sayılan ordusunda rəhbər vəzifələrdə otura bilməz. Çünki onlar Azərbaycan əsgərinə tam fərqli gözlə, istiqamətlə baxırlar. Onlar bu gün öz vəzifələrinin artırılması üçün əsgərimizi qurban verməyə hazır olan şəxslərdir. Necə ki, onlar xain əməllərini ört-basdır etmək üçün Azərbaycanın bir çox qeyrətli oğullarını öldürdülər, onları psixoloji quruma saldılar. Mən efirlərdə tam olaraq çox şeyi danışmamışam və bunları istintaqa deyəcəm. Çünki istəmirəm mənim xalqımın fikrində ordumuz pis canlansın, ümidsizlik, güvənsizlik yaransın. 

 

Mən şəxsən öz adımdan Ali Baş Komandan, Cənab İlham Əliyevə, Baş prokuror  Kamran Əliyevə təşəkkür edirəm və qeyrətli oğullarımızın aparacağı bu işdə hər kəsin öz layiqli qiymətinin veriləcəyinə böyük ümidim var. Gedişat artıq hər şeyi deyəcək. Artıq Baş prokurorluğa dəvət olundum, buna görə sevincliyəm. 

 

Bu deyilənlər şübhəsiz ki, sübut olunacaq. “Tərtər işi”ndə bizlərə qarşı çıxış edənlərin keçmişini varaqlamaq lazımdır. Onda hər şey məlum olacaq, bilinəcək kim-kimdir. O zaman biz düşməni də, dostu da tanıyacağıq. Azərbaycan Ordusunun əsgərinə, zabitinə qənim kəsilən bütün şəxslər ifşa olunacaq. Mən buna çox inanıram. İstəyərdim ki, Azərbayacan Respublikasının qanunlarında dəyişikliklər olunsun, ölüm hökmü bərqərar olunsun və o adamlar ölüm hökmüylə cəzalandırılsın. Çünki o adamların öz vətənimin havasını udmağa, suyunu içməyə narazıyam. Əgər əsgərimi təhqir edib, bu günə kimi həbsdə çürüdürlərsə, mən bunu onlara heç vaxt bağışlamayacam. 

 

Mənim ömrüm, həyatım bu sahəyə bağlıdır. On yeddi il hərbi forma geyinmişəmsə, niyə həyatım məhv olmalıdır. Şəffaf şəkildə bu iş araşdırılsa, cinayətkarlar məsuliyyətə cəlb edilib cəzalandırılsa, ölənəcən də vətənimə xidmət etməyə hazıram. Bu gün də söz verərəm ki, evimdə böyüyən üç oğlum da gələcəyin zabiti olacaq. Biz bu yoldan çəkilməyəcəyik, nə qədər ki, canım sağdır ölkə başçısına və Azərbaycan xalqına bütün həqiqətləri çatdıracam. Müəmmalı ölüm hadisələrinin üstü açılmalıdır. Bu gün övladını itirən valideynlər bunun səbəbini bilmək istəyir. Valideyn niyə görə bir ömür boyu fikirləşməlidir ki, onun oğlu necə öldü?! Əgər cinayətkarlar cəzalanarsa, hansı valideyn küsülü qalar ki? Həyatdı, qismətdir, hər şey olur. 

 

44 günlük Vətən müharibəsində şəhid olan üç min hərbçimizin anası onları vətənə ərməğan, xalqımızı təbrik etdilərsə, baxın, görün biz nələrə qadirik. Bir ata yanında iki oğluyla döyüşə getdi. Biz ailəlikcə tarixçi olmuşuq. Onu deyə bilərəm ki, Azərbaycan xalqının keçmişi tam fərqli olub və bu gün mən onu yaşayıram”.  

 

Qeyd edək ki, “Tərtər işi”nin yenidən araşdırılmasıyla bağlı Baş prokurorluqda yeni istintaq qrupu yaradılıb.