MM Mədəniyyət Komitəsinin sədri Q.Paşayeva məşhur azərbaycanlı jurnalist, görkəmli ictimai və elm xadimi Nəsir İmanquliyevin 110 illik yubiley konfransında çıxış edib

 

Onlayn konfransın aparıcısı Milli Məclisin Mədəniyyət Komitəsinin eksperti Əkbər Qoşalı Azərbaycanın Əməkdar jurnalisti və Əməkdar mədəniyyət işçisi, görkəmli ziyalı Nəsir İmanquliyevin anadan olmasının 110 illiyinə həsr olunmuş onlayn konfransın Milli Məclisin mədəniyyət Komitəsinin təşkilatçılığı, ADPU-nun Quba filialının, “Regional Hüquqi və İqtisadi Maarifləndirmə” İB-nin dəstəyi ilə keçirildiyini bildirib. O, Nəsir İmanquliyevin hələ sağlığında ustad kimi qəbul edildiyini, pedaqoq, jurnalist kimi şöhrət qazandığını, şöhrətinin respublika hüdudlarını aşaraq qardaş ölkələrdə də tanındığını vurğulayıb.

 

Milli Məclisin Mədəniyyət Komitəsinin Qənirə Paşayeva ilk yazıları dövri mətbuatda hələ tələbəykən çap olunmağa başlayan Nəsir İmanquliyevin şərəfli yaradıcılıq yolu keçdiyini, xalqın dilinin keşiyində durduğunu, gənc istedadlara diqqət-qayğı ilə yanaşdığını xüsusi vurğulayıb: “Nəsir İmanquliyev o, illərdə “Kommunist”, “Yeni yol”, “Gənc işçi”, “Vətənin səs” qəzetlərində ədəbi işçi, şöbə müdirinin müavini, şöbə müdiri, məsul katib, redaktor vəzifəsində çalışııb. II Dünya müharibəsi zamanı, 1942-ci ildə Nəsir İmanquliyev Krım cəbhəsinə göndərilib, orada “Vuruşan Krım” qəzetinin məsul katibi kimi fəaliyyət göstərib, eyni zamanda hərbi hissədə tərcüməçi kimi çalışıb.

 

 

Bir il sonra, 1943-cü ildə Nəsir İmanquliyev yenidən Bakıya  təyinat alıb, o dövrün ən tirajlı qəzetində məsul katib təyin edilib, burada onun vətənpərvərlik mövzusuna həsr edilmiş bir çox məqalələri işıq üzü görüb. 1946-cı ildə Moskvada Mərkəzi Qəzet kursunu bitirən Nəsir İmanquliyev Nəsir İmanquliyev, 1948-1950-ci illərdə Azərbaycan Dövlət Universitetinin (indiki BDU) Filologiya fakültəsində təhsil alıb. O, Azərbaycan  Dövlət Universitetində pedaqoji fəaliyyət göstərib, Jurnalistika fakültəsinin Jurnalistikanın nəzəriyyəsi və təcrübəsi kafedrasında dərs deyib.

 

Nəsir İmanquliyevin həyatında və bütövlükdə ölkə mediasının həyatında onun 1958-ci ildə yaratdığı “Bakı” qəzetinin özəl yeri olub. Çünki “Bakı” – “Baku” axşam qəzeti keçmiş SSRİ-də, demək olar, ilk təcrübə idi. 10 yanvar 1958-ci il tarixində qəzetin ilk nömrəsi işıq üzü görüb və mövcud olduğu illər içində bir ocağa çevrilib. Qəzet və onun qurucusu örnək alınıb.

Nəsir İmanquliyevin həyat və fəaliyyətindən söz açan mütəxəssislər onun ən azı üç istiqamətini özəlliklə fərqləndirir, görkəmli şəxsiyyəti peşəkar jurnalist, ictimai-siyasi xadim və alim, ziyalı olaraq xarakterizə edirlər. Bütün bu istiqamətlər onun yaratmış və uzun illər başçılıq etdiyi “Bakı”- “Baku” axşam qəzetinin bir sənət ocağına, yaradıcılıq lobaratoriyasına çevrilməsi ilə də öz təsdiqini tapır. Nəsir İmanquliyevin tələbəsi olmuş Rəşad Məcidin, “Bakı”- “Baku” qəzetinin elektron versiyası olan “Baku.az”ın şöbə müdiri Fəxriyyə Lilparın, BDU Juranlistika fakültəsinin dekanı Vüqar Zifəroğlunun, qardaş Türk ölkə və topluluqlarından ziyalıların, sizlərin hər birinizin bu gün bu konfransda iştirakınız, indiyədək Nəsir müəllim haqqında yazılmış sanballı kitablar dediklərimizi bir daha təsdiq edir.

 

Nəsir İmanquliyev 1965-ci ildə tarix elmləri namizədi alimlik dərəcəsi alıb.

 

 

Nəsir İmanquliyev Balahəsənli bəylərindən olan Yusif bəy Sultanovun qızı Gövhər Sultanzadə ilə ailə həyatı qurub və bu evlilikdən onların yeganə qız övladı, görkəmli şərqşünas alim Aida İmanquliyeva dünyaya gəlib. Aida xanım Azərbaycan Respublikasının Birinci vitse-prezidenti Mehriban Əliyevanın, tanınmış akademik, Lomonosov adına MDU-nun Bakı filialının rektoru Nərgiz Paşayevanın anasıdır.

 

2006-cı ildə Azərbaycan Respublikasının Prezidenti İlham Əliyev “Nəsir İmanquliyevin xatirəsinin əbədiləşdirilməsi haqqında” Sərəncam imzalayıb. Həmin ildə Ömər Eldarovun müəllifliyi ilə, görkəmli ziyalının yaşadığı binaya xatirə lövhəsi vurulub. 2007-ci ildə isə doğma BDU-da xatirə lövhəsi açılıb. 2011-ci ilin dekabrında Azərbaycan Respublikasının Prezidentinin sərəncamına əsasən Nəsir İmanquliyevin 100 illiyinə həsr olunmuş silsilə yubiley tədbirləri keçirilib.

 

Nəsir müəllim gözəl ailə başçısı, xeyirxah insan, gənclərin yolunu açan, onlara dəstək duran şəxsiyyət kimi qəlblərdə yaşayır.

 

Ruhu şad olsun”!

 

 

Millət vəkili Arzu Nağıyev, BDU-nun Jurnalistika fakültəsinin dekanı Dos.Dr. Vüqar Zifəroğlu, Nəsir İmanquliyev haqqında kitab yazmış tədqiqatçı-jurnalist Şərəf Cəlilli, Özbəkistanlı şair-publisist, tərcüməçi, Daşkənddəki Heydər Əliyev adına Azərbaycan Mədəniyyət Mərkəzinin əməkdaşı  Şəhla Qasımova, tanınmış Qaqzuz ziyalısı Güllü Qərənfil, AYB sədrinin müavini, “525-ci qəzet”in baş redaktoru Rəşad Məcid, “Şərq” qəzetinin baş redaktoru Dr. Akif Aşırlı, BAMF-ın qurucu-başqanı Umud Rəhimoğlu, “Baku.az” portalının şöbə müdiri, Nəsir İmanquliyev haqqında film çəkmiş Fəxriyyə Lilpar, RHİM İB sədri Arzu Bağırova konfransda çıxış edib.

 

Çıxışlarda görkəmli ziyalının örnək həyat və fəaliyyəti haqqında danışılıb, xatirələr bölüşülüb. Nəsir İmanquliyevin “Jurnalistika məsələləri” və digər əsərlərinin bu gün də öz aktuallığını saxladığı vurğulanıb. Çıxışçılar onun “Sanballı vəzifə tutsam da, ürəyim qəzet redaktorluğunda idi” sözlərini minnətdarlıqla xatırlayıblar.