Rusiya silahlı qüvvələri “sülhməramlı” adı altında Azərbaycanın işğal altında qalan Qarabağ torpaqlarının bir hissəsinə daxil olanda Azərbaycan cəmiyyətində bədbin əhval-ruhiyyə yarandı. Müxtəlif reaksiyaların içərisində daha populyar olan “Rusiya Abxaziyada olduğu kimi yerli əhaliyə öz pasportlarını verəcək” fikri tədricən aktuallığını itirsə də, bu siyasət daha təhlükəli formada zühr etməyə başlayıb . Bir müddət əvvəl “Qarabağın rus icması” ideyası ortaya atılanda yazmışdıq ki, heç Ermənistanın özündə icma səviyyəsində rusların yaşamadığı halda, Xankəndidə bu nə rus axtarışıdı?  Və məlum oldu ki, bir yerli erməninin həyat yoldaşı olan Somova soyadlı bir rus qadın icmaya rəhbərlik edirmiş və müharibə vaxtı da Putinə teleqram göndərib kömək istəyirmiş. Amma, Rusiyanın Qarabağda rus- slavyan əhalisinə istinadən planlaşdırdığı siyasət Somovanın bacara biləcəyi iş olmadığı üçün onu FSB-nin akademiyasını bitirmiş, yazıçı-jurnalist kimi təqdim olunan, Bakıda doğulmuş, rus familiyalı erməni Aleksandr Bordovu təcili Xankəndinə ezam etdilər və Bordov artıq ilk tapşırıqları yerinə yetirməyə start verib. 

Deməli, Xankəndidə guya rus icmasının ailələri üçün yeni il uşaq tamaşası keçirilib. Verilən informasiyadan məlum olur ki, 3 yaşdan 10 yaşa qədər 150-yə yaxın uşaq Şarl Aznavur adına Mədəniyyət Mərkəzində nağıl tamaşasına baxıb və onlara hədiyyələr verilib. Tədbir Rusiya-Ermənistan humanitar təşəbbüslərinin inkişafı və dəstəyi ilə “İrs və Tərəqqi” Fondu tərəfindən təşkil olunub. Həmən Bordov deyib ki, iştirakçılar rus, belorus, ukraynalı, polyak və erməni kökləri olan uşaqlardır. Verilən məlumatın başlığı daha “cəlbedici” və bir o qədər də təhlükəlidir. “2500-dən çox Qarabağ rus icmasının üzvləri....”. Və elə həmin Bordovun açıqlamasından məlum olur ki, “dekabrın 1-dən Dağlıq Qarabağda slavyanların və Rusiya vətəndaşlarının(!?) qeydiyyatı aparılır və icmanın sayı bu gün 2500-dür. Elə bilməyin ki, Qarabağda rəsmi sayı 1960 olan Rusiya sülhməramlılarını və Rusiya FHN -in humanitar yardım adı altında çalışanları icma kimi göstərirlər. Xeyr! Sən deməyəsən, Xankəndidə ruslar və digər slavyanlar ermənilərdən çox imiş. Yəni, “ İrəvanda rus qalmadı, o nə rusdur, Xankəndinə düzdürmüsən” vəziyyəti formalaşır.

 

Xüsusi xidmət orqanının əməliyyat fəaliyyətində “əfsanə” qurmaq vacib əməliyyat elementlərindəndir və bu əfsanələrlə bir insanı, bəzən bütöv bir toplumu idarə etmək mümkün olur. FSB Akademiyasının məzunu və Qarabağa ezam olunmuş Bordov üçün də əfsanə qurmaq çətin olmayıb. Bordov deyir ki, müharibədən sonra yerli əhaliyə maddi yardımlar edilib, ammaDağlıq Qarabağda yaşayan Rusiya vətəndaşları bu imkandan istifadə edə bilmədiyi üçün icma bu məsələni həll edib və guya bu hadisədən sonra “ Dağlıq Qarabağda yaşayan xeyli Rusiya vətəndaşı müraciət edib”. Deməli, Bordov özünü Rusiya vətəndaşı hesab edənlərə deyir ki, ortada pul da var, kim istəyir gəlsin, ona Rusiya vətəndaşlığı verək. Bordovun fikrincə indiki rus icması vaxtilə 1804-1813-cü illərdə Rusiya İran müharibəsində rus qoşunları ilə Qarabağa gələnlərin nəslinin davamçılarıdır bunlar.  Bax, xüsusi xidmət orqanının “əfasanəsi” budur! 

Bu icmanı hər gün saat 8.40-da avtobus Xocalıdakı provaslav kilsəsinə aparır ki, ibadət etsinlər, Vadim ata da Rusiya imperiyasının uzaq Qafqazda provaslavlığı necə yaydığını nağıl edir, yəni əfsanəvi  tamaşanın səhnəsində ən xırda detallar belə nəzərə alınıb. Axşamlar isə bu rus icmasına Ruben Osipov rus dili öyrədir, hətta Ağdərədən də bura ruslar gəlir. Heç SSRİ dönəmində Ağdərədə “dəyirmana rus tapmazdın”, indi erməninin özü yaşamadığı Ağdərədən guya ruslar icmaya gəlir?

 

Gələn il ləğv olunmuş keçmiş “Rossiya” kinoteatrı da fəaliyyətə başlayacaq, rus qəbristanlığı bərpa ediləcək.

İstəyirsiz növbəti fəaliyyətin ssenarisini təqdim edək. Gələn il, yaxın günlərdə Aleksandr Bordov “Rossiya” telekanalında Solovyovun qonağı olacaq və Qarabağda rus icmasının yaşadığı bir ərazi haqqında söhbət aparılacaq, daha doğrusu təbliğat aparılacaq. Sonra da Solovyovun o biri qonaqları-Zatulin, Baqdasarov, Marqarita Simonyan, Jirinovski və bu qəbildən olan Kreml sözçüləri Putinə televiziyadan müraciət edib “Qarabağın rus icmasının” təhlükəsizliyini qorumaq üçün daha böyük hərbi kontingentin göndərilməsini və “Qarabağ Rusiyadır” şüarını səsləndirəcəklər. 

Vaxtilə SSRİ Əfqanıstanı işğal edəndə şüurlara belə bir ideya yeridirdilər:”əfqan xalqı SSRİ-ni köməyə çağırdı..”. SSRİ dağılana yaxın məşhur aktyor Gennadi Xazanov bu şüara belə şərh vermişdi: “ Kabulda bir “babulya” avtomat telefona girib SSRİ Hərbi hava qüvvələrinə zəng edir və kömək istəyir. Cəsur qırıcı təyyarələr o saat havaya qalxaraq Kabula istiqamət götürmüş, Əminin sarayını tutaraq babulyanın çağırışını yerinə yetirmişlər”. İndi rus icması Putinə müraciət etsə ki, “danışdığımız kimi” bizi qoru və otur Qarabağda, heç təəccüblənməyin.., proses bu istiqamətdə gedir.

 

Paşinyanın Qarabağdan imtinasını qəbul etməyən Moskva çox məkrli planını reallaşdırmağa başlayır. Hər şey meydandadır və meydandakı top bizə atılıb...