Qulu Məhərrəmli 1954-cü ildə Zəngilan rayonunda anadan olub. Orta təhsilini Şuşa şəhərində alıb. 1978-ci ildə Bakı Dövlət Universitetinin jurnalistika fakültəsini bitirib. Həmin ildə təyinatla Azərbaycan televiziyasına göndərilib və “Xəbərlər” baş redaksiyasında reportyor kimi fəaliyyətə başlayıb.

Televiziyanın müxtəlif baş redaksiyalarında müxbir, redaktor, böyük redaktor, şərhçi, şöbə müdiri, proqram rəhbəri, baş redaktor, siyasi icmalçı və departament direktoru vəzifələrində çalışıb.

2014-cü ilin mayında akademik Tofiq Hacıyevin dəvəti ilə AMEA-nın İ.Nəsimi adına Dilçilik İnstitutunda fəaliyyətə başlayıb, institutun Monitorinq şöbəsinin müdiri vəzifəsində çalışıb. 2016-cı ildə Dilçilik institutunu tərk edib.

2016-cı ildə Azleks.az elektron lüğətlər toplusunun yaradılmasında iştirak edib və onun baş redaktoru təyin edilib.

Q. Məhərrəmli müxtəlif mövzularda 20-yə yaxın sənədli televiziya filminin ssenari müəllifidir. Bu filmlərin bəziləri beynəlxalq festival və müsabiqələrdə nümayiş etdirilib. Bir neçə xarici çoxseriyalı filmin Azərbaycan dilinə dublyajının bədii rəhbəri olub.

1982-ci ildən elmi fəaliyyətlə məşğul olan Q.Məhərrəmli 1989-cu ildə “Radiodramaturgiya dili” mövzusunda namizədlik, 2004-cü ildə isə “Televiziya dili: funksiya və struktur” mövzusunda doktorluq dissertasiyası müdafiə edib. Jurnalistika üzrə ölkədə ilk elmlər doktorudur. Elmi araşdırmalarında jurnalistikanın və medianın ümumi nəzəriyyəsi, televiziya və radionun tarixi, aktual elmi-nəzəri problemləri, o cümlədən ekran-efirin mürəkkəb dil sisteminin öyrənilməsi əsas yer tutur.

Q.Məhərrəmli 1991-ci ildən Bakı Dövlət Universitetində pedaqoji fəaliyyətə başlamış, 1998-ci ildə baş müəllim, 2002-ci ildə dosent vəzifələrini tutmuşdur. 2006-cı ildən Televiziya və radio jurnalistikası kafedrasının professorudur. 30-dan çox kitabın, o cümlədən bir neçə monoqrafiya, populyar dərslik və dərs vəsaitlərinin, həmçinin izahlı lüğətlərin müəllifidir.

Jurnalistika və elmi-pedaqoji fəaliyyəti ilə əlaqədar 60-a yaxın xarici ölkədə olmuşdur. Media problemlərinə həsr edilmiş nüfuzlu beynəlxalq toplantılarda, media forumlarında dəfələrlə Azərbaycan jurnalistikasını və jurnalistika elmimizi təmsil etmişdir. Avropa Şurasının MDB ölkələrində mətbuat azadlığı üzrə ekspertlərindən biridir.

2005-2008-ci illərdə Azərbaycan Mətbuat Şurası sədrinin müavini olmuş və "Şikayətlər üzrə komissiya"ya rəhbərlik etmişdir. Hazırda “Jurnalistikanın inkişafına yardım mərkəzi” adlı qeyri-hökumət təşkilatının rəhbəridir. Jurnalistika sahəsində ən yüksək mükafatlara (“Qızıl qələm”, “H.B.Zərdabi”, “Media açarı” və s.) layiq görülmüşdür.

 

Hazırda BDU-nun Multimedia və elektron kommunikasiya kafedrasının professorudur.

 

Ömrü rahat yaşamağa nə var ki?!

Saman çöpü daşımağa nə var ki?!

Oğul ona deyərəm  ki,  Ər olsun,

Haqq işində Kişi kimi nər olsun -

Sən millətin vicdan haqqın yaşadın!

Közü oldun - gözü duman millətə,

Ədaləti  sözdə uman millətə,

Könlü qübar, oxu, kaman millətə -

Sən millətin vicdan haqqın yaşadın!

Kəmənd atdın, yoxuşuna – iz aldın,

Cığırına  yol yorğanı üz aldın.   

Sevənlərin gözlərində ucaldın,          

Sən millətin vicdan haqqın yaşadın!

Yolunu kəsdilər, sözün yeridi,

Tüstülü ocağın,  közün yeridi,

Bu nağıl dünyada düzün yeridi

Sən millətin vicdan haqqın yaşadın!

Sənə qarşı  min bir günah etdilər,

Muştuluq aldılar, gözdən itdilər,

Lənət qapısından keçib  getdilər –

Sən millətin vicdan haqqın yaşadın!

Ağı deyən dilimizi  kiritdin,

Unudulmuş lüğətini  diriltdin,

Kaşğarini  şüurlara yeritdin, 

Sən millətin vicdan haqqın yaşadın!

Söz qələmin cahad edir, savaşır,

İnsanlığı həqiqət tək yaşadır,

Alın yazın taleyinlə barışır -

Sən millətin vicdan haqqın yaşadın!

Sən sözün gücünə sahib çıxmısan,

Döyüşdən  mərd kimi qalib çıxmısan,

Düşməndən əvəzin alıb – çıxmısan,

Sən millətin vicdan haqqın yaşadın!

Alimliyin, kamilliyin mübarək,

Elmə dayaq  güvənliyin mübarək,

Günəş üzün, müdük adın mübarək.

Sən millətin vicdan haqqın yaşadın!