Erməniləri təbrik edirəm!

 

Ermənistanda prezident seçkiləri başa çatdı. Ermənistan parlamenti ikinci turda keçmiş yüksək texnologiyalar sənayesi naziri Vaaqn Xaçatryanı prezident vəzifəsinə seçdi. Bu münasibətlə Ermnəistan xalqının bir hissəsini səmim qəlbdən təbrik edirəm! Zarafatdan və sarkazmdan kənar yazıram, məni bu cümləyə görə qınaya da bilərsiniz, amma mən bəzi erməniləri təbrik edirəm, vəssalam!

 

Təbrikin səbəbi, mənim Ermənistanın əvvəlki Prezidenti Armen Sarkisyanı yaxından izləməyimdir. Səbəbini açıqlayım.

A.Sarkisyan prezident seçilməsindən istefasına qədər baş verən hadisələr, “Oskar” mükafatına layiq əsl tarixi tragekomik film üçün ideal ssenari ola bilər. Çünki, ölkə qanunlarına zidd olaraq prezidenti yalnız Ermənistanda seçə bilərdilər. Seçdilər də. 

 

5 ilə yaxın ölkəyə rəhbərlik edən A.Sarkisyan yalnız istefa ərizəsi yazanda məlum oldu ki, Ermənistan prezidenti Sent Kitts və Nevi vətəndaşıdır. Belə çıxır ki, bu 5 il ərzində A.Sarkisyanın imzaladığı bütün fərmanlar, sərəncamlar, qanunlar, müqavilələr, təyinatlar və s. hamısı qanunsuzdur. Hətta seçki nəticələrinə görə N.Paşinyanın Baş nazir təyin edilməsi də saxtadır. Tarixi saxta olan Ermənistanın Prezidenti də, onun təyin etdikləri də saxta çıxdı. Amma Ermənistanın siyasi dairələri və onun ətrafında olanlar, bu məsələni məharətlə görməzdən gəlirlər. 

 

A.Sarkisyanın Qarabağda müharibənin başlanmasını da televiziyadan eşitməsinə dair komik etirafını yəqin ki, ermənilər də eşidib.  

A.Sarkisyan istefa ərizəsini də ölkə xaricində yazan tək Prezident kimi adını saxta Ermənistan tarixinə yazdığı isə yaxın keçmişin hadisəsidir. Yəqin ki, A.Sarkisyan heç vaxt Ermənistana qayıtmayacaq, çünki saxtakarlıq zəminində açılan cinayət işi üzrə məsuliyyətə cəlb oluna bilər. Məsələ burasındadır ki, A.Sarkisyan qayıdarsa, Prokurorluqda və ya məhkəmədə sorğu sual edənlər də saxta prezidentin saxta əmrləri ilə vəzifəyə təyin ediliblər. Belə çıxır ki, Ermənistan məhkəməsinin qəbul etdiyi qərar da saxta olacaq. 

 

1996-cı ilin sonunda Ermənistan siyasi arenasında yer alan A.Sarkisyanın vətəndaşlığını gizli saxlayaraq bütün ölkəni barmağında fırlada bilməsi, əlbəttə ki, xüsusi “talant” tələb edirdi.  

 

Saxta əlil, saxta qəhrəman, saxta veteran və s. komik ifadələrlə ilə tanış olan dünya ictimaiyyəti, saxta Ermənistan sayəsində 5 il fəaliyyət göstərən saxta prezident ilə də yaxından tanış oldu. Əslində təəccüblü heç nə baş vermir. Uzun onilliklər boyu hamımızın şahidi olduğumuz Ermənistanın saxtakarlıqları artan dinamika nümayiş etdirməkdədir. 

 

Odur ki, bu gün və ya gələcəkdə, istənilən nəfəs alan kütləni Ermənistanda prezident seçsələr, əvvəlkindən daha yaxşı olacaq. Əgər Armen Sarkisyan kimi bir saxtakar prezident seçilərək 5 il ermənilərin yuxuya verə bilmişdisə, deməli nəinki Vaaqn Xaçatryanın, istənilən saxtakarın Ermənistan prezidenti qoltuğunda oturması təəccüblə qarşılanmalı deyil.

 

Buna görə də işğalda iştirak etməyən, Azərbaycan tərəfə atəş atmayan və ya digər cinayətlər törətməyən günahsız və yuxulu erməniləri təbrik edirəm! 

 

Başda Arayik, Seyran, Robet və Serjik olmaqla, qalanlarını isə Qobustanda təbrik etməyi 30 ildir səbirsizliklə gözləyirəm.