Moderator.az dövlət mükafatı laureatı, əməkdar incəsənət xadimi, kinorejissor, aktyor Şeyx Əbdül Mahmudbəyovla söhbətin ikinci hissəsini təqdim edir.
Söhbətimizin
birinci hissəsini bu linkdən (//www.moderator.az/news/145967.html)
oxuya bilərsiniz.
II hissə
Hacıbalaya tərəfkeşlik edənlər də mənimlə düşmənçilik
aparır...
“Şeyx Əbdül heç kimin
düşməni deyil və heç kiminlə də düşmənçiliyi yoxdur. Kim də mənim adımdan
danışırsa, ünvanıma nə deyirsə, Allah onun bəlasın verəcək. Mənimlə işiniz
olmasın, gəlin iş görək. Mən də sizin kimi məddahlıqla, yaltaqlıqla özümə gün
ağalaya bilərdim. Bu günlərdə mənim xanımımın, nəvəmin doğum günü idi. Onlara
bir dənə gül almağa belə cibimdə bir manatım yox idi.
İndiyəcən qazandığım
bircə evim var idi. Onu da Qış Parkında yeraltı qaraj tikiləndə Hacıbala adlı kimliyi, mənsubiyyəti, əxlaqı, gördüyü işlər heç
kimə bəlli olmayan birisi uçurtdu. Gecənin bir aləmində zəlzələ təkanı ilə
evimizdən bayıra qaçdıq. Məlum oldu ki, yerin altında aparılan qazıntı işlərini
düzgün qurmadıqlarından evimiz dağılıb. Tikintini aparan şirkətin iş icraçısı gəlib
üzr istədi, dedi dərhal aidiyyati quruma xəbər verəcəyik və probleminizi həll
edəcəyik. Ancaq üstündən bir həftə keçdi səs-soraq çıxmadı, sonra ANS çəkib
efirə verdi. Sujet gedən kimi Baksovetdən, icra hakimiyyətindən, MİS-dən nümayəndələr
gəldi və dedilər ki, 10-15 gündən sonra sizi buradan köçürəcəyik. Həmin gün
axşam mənə Hacıbala özü zəng vurdu. Dedi ki, narahat olma, hər şeydən xəbərim
var, iki balamın ölmüşünə beş-on günə hər şey həll olunacaq. Üstündən bir ay
keçdi, gördüm ki, məni məhkəməyə verib. Məhkəmə oldu, 25 faiz mənim xeyrimə qərar
çıxartdılar. Daha sonra Apelyasiya Məhkəməsinə etiraz verdilər və bu dəfə də 35
faiz mənim xeyrimə qərar verildi. Sonra da Ali Məkhəməyə verdilər və Ali Məhkəmə
də mənim xeyrimə çıxarılan qərarı 50 faiz elədi. Bir ilə yaxındır ki, əlimdə 3
məhkəmə qərarı, həmçinin mövcud olan bütün sənədlərlə ortada qalmışam. İcra
strukturları da Hacıbaladan qorxur, qaçır. Hacıbalaya tərəfkeşlik edənlər də mənimlə
amansız düşmənçilik aparırlar, hara gedirəmsə, qapıları üzümə bağlayırlar.
İstəyirlər
ki, mən bezdirsinlər və mən də Avropaya üz tutum. Amma bilsinlər ki, ölsələr də
mən əxlaqsız, mənəviyyatsız Avropa
qapılarına düşüb Azərbaycanın dövlətçiliyini, imicini biabır etməyəcəm. Mən bu
millətin elminə, tarixinə, mədəniyyətinə, kinosuna xidmət edirəm, hansısa Hacıbalaya
görə Avropada bizə düşmən olan təşkilatların qapısında yatmayacam”.
Hacıbalayla aramızda heç kimin bilmədiyi bir məsələ
var...
“Hacıbalayla aramızda
heç kimin bilmədiyi bir məsələ var və o elə bilir ki, mən həmin məlumatı mətbuata
çıxaracam. Ona görə məni gözdən salmağa çalışır, ancaq bilmir ki, mən onun kimi
adam deyiləm. O bizim aramızda olan kişi söhbətidir və heç vaxt onu mətbuata
çıxartmaram. Ancaq söz vermişəm ki, inşaallah onun məhkəməsində hər şeyə
tüpürüb onun üzünə duracağam. Çünki onun xalqa etdikləri mənim gözümün
qabağında olub, ələlxüsus da Bakıya, Bakı camaatına. Bu insan o qədər mənəviyyatsız, yarasız, qeyri
səmimi adamdır ki, hamıya mən ona hər şey təklif edirəm, amma razı olmur deyir”.
Mədət Quliyevə müraciət edəcəm...
“İndiyəcən 3
dəfə prezidentə müraciət etmişəm, ancaq it-bat olub, prezidentə çıxmayıb. Bu
günlərdə Ali Məhkəmənin sədrinə də müraciət hazırlamışam. Prezidentlə aramızda
Çin səddi qurulduğuna görə, Mədət Quliyevə müraciət hazırlayıram. Mədət müəllimlə
görüşüb ondan xahiş edəcəm ki, mənim dediklərimi prezidentə çatdırsın. Buna mənim
haqqım var, çünki prezident mənə Əməkdar incəsənət xadimi adını verib, Dövlət
Mükafatı laureatıyam. Bu gün Dövlət Mükafatı laureatı dövlət televiziyasına
buraxılmır. Bunun da səbəbini Mədət müəllimdən soruşacağam. Əgər düşmənəmsə, xəyanətkaramsa,
məni niyə həbs etmirlər. Yox əgər kimlərinsə şəxsi marağına qurban edilirəmsə, şəxsi-qərəzliyin
güdazına gedirəmsə, kimsə vəzifəsindən sui-istifadə edərək məni əzməyə
çalışırsa, o zaman xahiş edirəm məni müdafiə etsinlər. Elə etməsinlər ki, mən özüm
fərdi şəkildə ailəmin, halal zəhmətlə qazandığım mülkümün müdafisəsinə qalxım. Mədət
müəllimi qeyrətli, milli ruhlu biri kimi tanıyıram, ona görə ümid edirəm ki, o,
nəsə edəcək”.
Ziya Səmədzadənin səsi niyə çıxmır...
“Daha sonra
deputatımız Ziya Səmədzadəyə müraciət etmək istəyirəm. Axı mən ona səs vermişəm,
o mənim qanuni vəkilimdir. Nəyə görə indi onun səsi çıxmır, niyə susur? Axı mənim
səs vermədiyim millət vəkilləri mənə dəstək çıxırlar, münasibət bildirilər. Qorxur
ki, qızı Aygün Səmədzadənin bir mahnısını efirə buraxmazlar? Burada söhbət ağsaqqal
bir sənətkarın, təpədən dırnağa milli ruhda olan bir insanın ailə faciəsindən gedir.
Bu gün mənə irad tuturlar ki...
“Bu gün mənə
irad tuturlar ki, sən nə çox milli-mənəvi dəyələrdən danışırsan. Əvvəla qeyd
edim ki, hər şeyin bir düsturu, açılışı var. Söhbət əgər mənəvi-dəyərdən gedirsə, millət yoxdursa,
onun hansı mənəvi dəyəri ola bilər? Deməli, birinci növbədə millət olmalıdır,
millət formalaşmalıdır, təkamüllə inkişaf etməlidir və nəhayət zamanla,
ictimai-siyasi mühit dəyişdikcə millətlər də artıq oturuşmuş olur. Millətlər də
milli-mənəvi dəyərlərini, idarəçilik sistemlərini formalaşdırırlar. Bizim mənsub
olduğumuz xalq dünyanın ilk yaradılışında mövcud olan xalqdır. Azərbaycan ərazisi günəş
sistemindədir və burada hər şey müqəddəsdir. Bütün elm, mədəniyyət burdan
başlayıb. Adəm peyğəmbər də, İbrahim peyğəmbər də burda olub, təkallahlılıq da
buradan başlayıb. Bununla bağlı əlimizdə faktlar var. Türklər zaman-zaman bütün
dünyaya bəs edəcək, dərs olacaq qədər dünyanın sivilizasiyalarını
formalaşdırıblar. İstəsələr də, istəməsələr də bu faktdır. Peyğəmbərimiz də
buyurub ki, türkün dilini öyrənin, gələcək türkündür. Peyğəmbər buyurudu ki, mən
Allahın dərgahına gedəndə türk oğlu at belində savaşa gedən kimi gedirdim.
Deyirdi ki, türk yatmış bir nəhəng öküzdür, onu oyatmayın, sonra qarşısında
dayana bilməyəcəksiz. Mən inanıram ki, dünyanın ilk milləti olan və ilk mədəniyyətləri
formalaşdıran, ilk mənəvi dəyərləri, idarəçilik sistemini yaradan türklər
inşaalah yenə də mütləq hakim olacaq. Buna qəti şübhəniz olmasın, sadəcə bu
zaman kəsiyində bizim boynumuza düşən vəzifə ondan ibarətdir ki, özümüzü
tanıdaq. Kimliyimizi bilək və onu ağılla, şüurla, erməni kimi yalan uydurmadan,
konkret faktlara söykənərək bütün dünyada təbliğ edək. Bu yerdə dövlətin çox
ciddi nəzarəti olmalıdır. Bura xidmət edənlər şəxsi, qohum əqrəba, tayfa
münasibətlərini, şəxsi qərəzliyi kənara qoymalıdır”.
Mən bunların da davasını döyürəm”¦
“Dünya səsdən,
muğamatdan yaranıb və onun da beşiyi başında biz dururuq. O səslər, 7 səs, 7
ritm, 7 avaz bizə məxsusdur, o cümlədən də rəssamlıq sənətində 7 rəng də bizə məxsusdur,
ona miniatur janrı deyirlər. Onun
da başında Seyid Əli, Seyid Məhəmməd, Behzad kimi böyük sənətkarlar dayanırlar.
Bu gün bütün dünyada ad-san qazanmış Betxovenlər, Ştrauslar, Şultslar, Baxlar
hamısı bizim icad etdiyimiz 7 səslə, 7 notla işləyir. 7 notu bizim babamız
1300-cü ildə kəşf edib. Əbdül Qədir Marağayiyə məxsusdur, əlimdə sənədlər var.
Ondan əvvəl Seyid Yəhya Bakuvinin səs elmiylə bağlı bir neçə tədqiqat işləri
var. Səsi aparıb Allaha bağlayırlar, çünki muğamat yaganə səsdir ki, əvvəli
var, axırı yoxdur. Məhz bizim dilimizdə olan sait və samit səslərin üzərində
qurulub. Hər dəfə instituta gedəndə deyirəm ki, sizdən xahiş edirəm “ğ”, “g”,
“h” hərflərini qoruyun, öldürməyin, “qonaq”, “otaq” deməyin. Otaq deyə-deyə
metallaşırıq, cazlaşırıq, repləşirik, klassik səsimiz yavaş-yavaş ahəngini
itirir. Mən bunların da davasını döyürəm”.
Ən dəhşətlisi də odur ki”¦
“Bu gün ailə
institutumuz məhv edilir, boşanmaların sayı durmadan artır, cavanlarımız azad
münasibətə üstünlük verirlər. Və mən bunları bir ağsaqqal olaraq şəxsi faciəm qədər
yaşayıram. Bunların qarşısını almaq üçün nələr etdiyimi bir allah bilir. Televiziyalarda,
radiolarda, institutlarda görüşlərim olur və buna qarşı təbliğat aparıram.
Bir xəstəliyi müalicə
etmək üçün ilk növbədə düzgün diaqnozu qoyulmalıdır. Bugünkü cəmiyyətimizin planlı
şəkildə məhv edilməsinin birinci səbəbi də, yəni diaqnozu təhsilin çox pis vəziyyətdə
olmasıdır. Hələ də başa düşmürəm ki, özəl universitet nə deməkdir və kənddə
dana, inək satmaqla orada uşaq oxudanların məqsədi nədir? Bu cür təhsil sistemi,
bu cür ideologiya nəyə lazımdır axı? Bu təbliğat bizi hara aparır və arxasında
kimlər dayanır, məqsədləri nədir?
Biz əl-ələ verib
yaxşı dəyərlərimizi saxlamalıyıq axı, əgər ondan yaxşısı varsa, gəlin onu qəbul
edək. Yoxsa uzun tarixə söykənən dəyərlərimizi silib, dağıdırıq və əvəzində də
heç bir şey yoxdur, onurğasız vəziyyət yaranıb, hərə ağzına gələni danışır. Ən
dəhşətlisi də odur ki, heç kim o şəxsi mənindən, dəyərlərindən, intellektual səviyyəsindən
çıxış edərək danışmır. Hamı vəzifənin altından danışır. Mən beş-üç il vəzifədəyəmsə,
dediklərim də Quran ayəsidir, icra olunmalıdır. Səhər də xəyanətkar kimi vəzifədən
atılır. Bu millətin də 10-15 ili həmin filankəsin mənəm-mənəmmliyinin,
hegemonluğunun qurbanı olur. Bəs biz o vaxtı necə bərpa edək, dəymiş ziyanları
hansı yolla özümüzə qaytaraq?”
Bu barədə prezident sərəncam verməlidir ”¦
“Milli ideologiyamız
mütləq qorunmalıdır və bu iş mütləq namuslu, qeyrətli, içində milli ruhu olan
adamlara tapşırılmalıdır. Ölkənin sayılıb-seçilən ağsaqqalları,
ağbirçəkləri, elm, sənət, mədəniyyət fədailəri bu işdə iştirak etməlidir. Vəzifəsi,
biznesi, maddi maraqları olan adamlar yox. Və bütün bunların hamısı vahid bir mərkəzdən
nəzarətə götürülüb, idarə olunmalıdır. Bu bir məsləhət şurası xarakteri
daşımalıdır və bu məsləhət şurası təxribatla yox, sırf xalqa məşğul olmalıdır.
Bu zaman da qərəzə, tamaha, yerlibazlığa, qohumbazlığa, ögey-doğmalığa yol
verilə bilməz. Çünki kollektiv müzakirə olunmalıdır və kollektiv müzakirənin də
nəticəsi əsaslı şəkildə, konkret dəlil və sübutlara istinadən ölkə başçısına təqdim
edilməlidir. Və prezident də bu barədə sərəncam verməlidir, çünki bu xalqın
qarantı prezidentdir”.
Rumiyyə MİRASLAN